ઘાયલ તરૂણ પ્રમોદ સોનખીયા હોસ્પિટલમાં સારવાર હેઠળ જીઈબીની લાપરવાહી ઉજાગર થઈ
(વર્તમાન પ્રવાહ વાપી બ્યુરો)
વાપી, તા.23: વાપી છરવાડા રમઝાનવાડી વિસ્તારમાં નિર્માણાધિન શિવશીવા રેસિડેન્સી પાસે જીઈબી દ્વારા લગાવાયેલ ટ્રાન્સફોર્મરથી એક 7 વર્ષિય કિશોરને વીજ કરંટ લાગતા હોસ્પિટલમાં સારવાર માટે ખસેડાયો હતો.
વાપીમાં કન્સ્ટ્રકશન સાઈટો ઉપર જીઈબી ટ્રાન્સફોર્મર બેસાડીને બિલ્ડરોની વીજળી આપુર્તિ કરતી રહે છે પરંતુ ટ્રાન્સફોર્મર ચોમેર વાડ કે સુરક્ષા વગર ઉભા કરી દેવાય છે. તેવા ખુલ્લા ટ્રાન્સફોર્મરથી એક બાળકને વીજ કરંટ લાગવાની ઘટના આજે બની હતી. છરવાડારમઝાનવાડી સ્થિત શિવશીવા રેસિડેન્સી સામે જીઈબીનું ખુલ્લુ ટ્રાન્સફોર્મર કાર્યરત છે. બાજુની સોસાયટી સાંઈલીલા રેસિડેન્સીનો 7 વર્ષિય બાળક તરૂણ પ્રમોદભાઈ સોનખીયા રમતા રમતા ટ્રાન્સફોર્મર પાસે પહોંચી ગયો હતો. જ્યાં તેને અચાનક કરંટ લાગતા કિશોરને તાત્કાલિક હરિયા હોસ્પિટલમાં સારવાર માટે ખસેડાયો છે. જીઈબીની બેદરકારીને લીધે એક 7 વર્ષનો બાળક આજે જીંદગી અને મોત વચ્ચે સંઘર્ષ કરી રહ્યો છે.
