(વર્તમાન પ્રવાહ વાપી બ્યુરો)
વાપી, તા.16
ઉત્તર ભારતીય સેવા ટ્રસ્ટ દ્વારા આજે રવિવારે વી.આઈ.એ.માં 15મા રક્તદાન કેમ્પનું આયોજન કરવામાં આવ્યું હતું. જેમાં ઉત્સાહભેર રક્તદાતાઓએ 105 યુનિટ રક્તદાન કર્યું હતું.
આ પ્રસંગે ઉત્તર ભારતીય સેવા ટ્રસ્ટના અધ્યક્ષ પપ્પુભાઈ તિવારીએ જણાવ્યું હતું કે,વાપી ઉદ્યોગનગરી છે. તેથી અકસ્માતોમાં વધુમાં વધુ રક્તની જરૂરીયાત રહે છે. તેથી ટ્રસ્ટ દ્વારા 14 વર્ષ પહેલાં રક્તદાન સેવાનો પ્રારંભ કર્યો હતો. ધીરે ધીરે રક્તદાન દર ઓછો થઈ રહ્યો છે. રક્તદાતાઓ સ્વૈચ્છીક રીતે રક્તદાન કરવા આગળ આવી રહ્યા છે. આ પ્રસંગે કેતન જોષીએ જણાવ્યું હતું કે, 2020-21માં 6 હજારથી વધુ યુનિટ રક્તદાન એકત્રીત કર્યું છે. છતાં પણ સ્થાનિક જરૂરીયાતમાં ઘટ પડે છે જે અન્ય બ્લડ બેંક પાસેથી બ્લડ લાવવું પડે છે. આ બ્લડ કેમ્પમાં વાપી લાયન્સ બ્લડ બેંક અને વાપી હરીયા હોસ્પિટલની ટીમે સેવા આપી હતી. આ પ્રસંગે ઉત્તર ભારતીય સેવા ટ્રસ્ટના મહાસચિવ સુભાષભાઈ તિવારી, ઉપાધ્યક્ષ રવિન્દ્ર પાન્ડે, કોષાધ્યક્ષ પંકજસિંહ, રવિન્દ્રસિંહ સહિત સમાજના અગ્રણીઓ ઉપસ્થિત રહ્યા હતા.
