પાલિકાને ભંડોળ અપાવવા નાણામંત્રી ઉણા ઉતરી રહ્યા છે : ખંડુભાઈ પટેલ
(વર્તમાન પ્રવાહ વાપી બ્યુરો)
વાપી, તા.17: વાપી સહિત સમગ્ર વિસ્તારમાં વરસેલા અતિશય વરસાદને લીધે ઠેર ઠેર રોડ ઉપર ખાડે ખાડા પડી જતા રોડની હાલત કંગાલ થઈ ગઈ છે ત્યારે શહેરમાં પડેલા ખાડાઓ માટે આજે રવિવારે પાલિકા વિરોધ પક્ષના નેતા અને કોંગ્રેસ કાર્યકરોએ વિરોધ નોંધાવ્યો હતો. વોર્ડ નં.8 વિસ્તારના તૂટી ગયેલા રોડ પરના ખાડાઓમાં વૃક્ષો વાવી પાલિકાના થાળે ગયેલા વહીવટ સામે સુત્રોચ્ચાર કરી રોડ જલદી બનાવવાની માંગણી કરી હતી.
વાપી નગરપાલિકા વિરોધ પક્ષના નેતા ખંડુભાઈ પટેલની આગેવાની હેઠળ કોંગ્રેસ કાર્યકરો અને મહિલા સમિતિએ વોર્ડ નં.8 માં રોડ ઉપર પડેલા ખાડાઓ માટે વિરોધ પ્રદર્શન કરી ખાડાઓમાં વૃક્ષો વાવ્યા હતા. આ પ્રસંગે ખંડુભાઈએ જણાવ્યું હતું કે, પારડી વિધાનસભા વિસ્તારમાં વાપી પાલિકા આવી છે. ધારાસભ્ય કનુભાઈ દેસાઈ નાણામંત્રી છે છતાં પણ પાલિકાને નાણા ફાળવવા નિષ્ફળ રહ્યા છે તેવો આક્ષેપ કર્યો હતો. કાર્યકરોએ તૂટેલા રોડ ઉપર વૃક્ષારોપણ કરી સત્તાધારી ભાજપ પક્ષ અને સરકાર સામે વિરોધ કરી આકરા પ્રહાર કર્યા હતા. નોંધનીય છે કે, વિરોધ કરવા માટે ગણીને 12 કાર્યકરો ઉપસ્થિત રહ્યા હતા ત્યારે શહેર કોંગ્રેસ શહેરના વિકાસમાંઉદાસીન હોય તેવુ જણાયું હતું.