વાપી-નાસીક સ્ટેટ હાઈવેની કક્ષાના આ રોડ ઉપર દર બે-ત્રણ ફૂટે ખાડા જ ખાડા વાહન ચાલકોની રોડ અગ્નિ પરિક્ષા લઈ રહ્યો છે
(વર્તમાન પ્રવાહ વાપી બ્યુરો)
વાપી, તા.19: વાપી મોટાપોંઢા નાસિક રોડ વાપી માટે અત્યંત ઉપયોગી હાર્ટલાઈન શમો આ રોડ છે. પરંતુ આ રોડને છેલ્લા બે-ત્રણ વર્ષથી જાહેર બાંધકામ વિભાગનું ગ્રહણ લાગી ચૂક્યું છે. પ્રત્યેક ચોમાસામાં વાપીથી મોટાપોંઢા 10 કી.મી.નો રોડ વરસાદમાં તૂટી ખાડે ખાડામાં પરિવર્તિત થતો આવ્યો છે. તેમાં ગયા સપ્તાહની અતિવૃષ્ટિમાં રોડે જવાબ આપી દીધો. દર બે-ત્રણ ફૂટે મસમોટા ખાડા એકબીજાની હરિફાઈ કરી રહ્યા છે તેનો સીધો ભોગ જાહેર જનતા અનેવાહન ચાલકો બની ચુક્યા છે. ચન્દ્રની સપાટી કરતા પણ બદ્દતર હાલત.
વાપી નાસિક સ્ટેટ હાઈવેની કેટેગરીમાં આવતા રોડને સ્ટેટ હાઈવે કદાપિ ના કહી શકાય તેવી સ્થિતિ રોડની બની ચૂકી છે. રોડથી સૌથી વધુ પરેશાન અને હાલાકી ચણોદથી કરવડ વચ્ચે ડુંગરી ફળીયાના સ્થાનિક રહીશો વાહન ચાલકો બની રહ્યા છે. ખાડાઓ વચ્ચે લોકો રોડ શોધી રહ્યા છે. લોકોની આ અવદશા માટે પી.ડબલ્યુ.ડી. સીધી જવાબદાર છે જ. કારણ છેલ્લા ત્રણ વર્ષથી આ રોડ તમામ ચોમાસામાં જવાબ આપી દે છે. થીગડ થાગડ હલકી કક્ષાના રોડ બનાવી ડીપાર્ટમેન્ટ ભ્રષ્ટાચાર આદરે અને ભોગ લોકો બને તેથી જનઆક્રોશ ચરમસીમા ઉપર છે.