(વર્તમાન પ્રવાહ ન્યુઝ નેટવર્ક)
દમણ, તા.21
દમણ જિલ્લા પંચાયત સંચાલિત પ્રાથમિક/ઉચ્ચ પ્રાથમિક શાળા ઝરીમાં જન્માષ્ટમીની ભવ્ય ઉજવણી કરવામાં આવી હતી. શિક્ષણની સાથે સાથે બાળકોમાં ધાર્મિક ભાવનાના ગુણો વિકસે એ હેતુથી શાળાના હેડમાસ્તર શ્રીમતી સુમનબેન પટેલના માર્ગદર્શન હેઠળ દહીં-હાંડી ફોડી કૃષ્ણ જન્મોત્સવની ભવ્ય ઉજવણી કરવામાં આવી હતી.
શાળાના બાળકોમાં કૃષ્ણ જન્મોત્સવનો થનગનાટ જોવા મળી રહ્યો હતો. બાળકો કૃષ્ણ-ગોપીઓના વેશમાં તૈયાર થઈ દહીં હાંડી ફોડી કૃષ્ણ જન્મોત્સવને વધાવવા આતુર હતા. ‘જય રણછોડ માખણ ચોર…’, ‘હાથી ઘોડા પાલખી, જય કનૈયા લાલ કી’, ‘નંદ ઘરે આનંદ ભયો જય કનૈયા લાલ કી…’ના નારા સાથે બાળકો મસ્તીમાં ઝૂમી રહ્યા હને શાળાના કૃષ્ણવેશમાં આવેલા જેનીલ ધોડીએ મટકી ફોડી બધા બાળકોને દહીં-માખણના પ્રસાદમાં રંગી આનંદ માણ્યો. ત્યારબાદ શાળાના બાળકો તથા શિક્ષિકાઓ સાથે મળી ગરબાના તાલે ઝૂમ્યા. આ પ્રસંગે વાલીઓ પણ હાજર રહ્યા હતા.
શાળાના શિક્ષિકા બહેનો ડિમ્પલબેન, હેતલબેન, બિનલબેન, નિકિતાબેન, વિભૂતિબેને કાર્યક્રમને સફળ બનાવવા ભારે મહેનત કરી શાળાના એસએમસી અધ્યક્ષશિલ્પાબેન હળપતિ પણ હાજર રહી બાળકોના ઉત્સાહમાં વધારો કર્યો. અંતમાં શાળાના બધા બાળકોને આચાર્ય શ્રીમતી સુમનબેન પટેલ તરફથી ચોકલેટ વહેંચવામાં આવી હતી.