કન્ટેનરમાં મૃત 50 જેટલા બળદો મળી આવેલા : દફનવિધી હાથ ધરાઈ
(વર્તમાન પ્રવાહ વાપી બ્યુરો)
વાપી, તા.01: કપરાડા-નાસિક રોડ ઉપર કપરાડા પોલીસ આજે ગુરૂવારે વાહન ચેકીંગમાં હતી ત્યારે નાસિક તરફ જઈ રહેલ મૃત પશુઓ ભરેલુ કન્ટેનર પોલીસે ઝડપી પાડયું હતું.
કપરાડા નાસિક રોડ ઉપર પોલીસ વાહન ચેકીંગ કરતી હતી ત્યારે એક દુર્ગંધ મારતુ કન્ટેનર પસાર થતા પોલીસે કન્ટેનર અટકાવવાની કોશિષ કરી હતી પરંતુ ચાલક ભાગી છૂટયો હતો. આગળ જઈ કન્ટેનર છોડી ફરાર થઈ ગયો હતો. પોલીસે કન્ટેનરનો કબજો કરી તપાસ કરી તો કન્ટેનરમાં મૃત 50 જેટલા બળદો મળી આવ્યા હતા. પશુપાલન વિભાગને જાણ કરી પશુઓનું પી.એમ. કરાવાયું હતું. ત્યારબાદ પશુઓની દફનવિધી હાથ ધરાઈ હતી. પોલીસે અજાણ્યા કન્ટેનર ચાલક વિરૂધ્ધ ગુનો નોંધી આગળની તપાસ હાથ ધરી છે. ક્યાંથી મૃત બળદ ભરવામાંઆવ્યા અને ક્યાં પહોંચાડવાના હતા તેની વિગતો બહાર આવશે.
