(વર્તમાન પ્રવાહ ન્યુઝ નેટવર્ક)
સેલવાસ,તા.15: દાદરા નગર હવેલી અનુસુચિત જાતિ/જનજાતિ અધિકાર મોરચાના પ્રમુખ દ્વારા સોશિયલ મિડિયામાં વાયરલ ફોટાની તપાસ કરવા કલેક્ટર અને એસ.પી.ને લેખિત રજૂઆત કરી છે. જેમાં જણાવ્યા અનુસાર ગત 8 સપ્ટેમ્બરના રોજ એમના વોટ્સએપ પર વાઇરલ થયેલ ફોટો જોયેલ જેમાં ભિલોસા કંપનીમાંનો લેબર કોન્ટ્રાક્ટર જે પિતાની ઉંમરનો દેખાય છે,તે કોન્ટ્રાક્ટર તેના કોન્ટ્રાક્ટ હેઠળ કામ કરતી ઉંમરમાં નાની સગીર ગરીબ મજબુર આદિવાસી છોકરીઓને લલચાવી બહેકાવી અને ફોસલાવીને તેઓનું શારીરિક શોષણ કરી રહેલ તેવી શંકા છે. તેમજ અનૈતિક કામ કરાવી રહેલ હોય તેવી પણ શંકા છે અને વાયરલ ફોટોમાં બારીકાઈથી નિરીક્ષણ કરો તો દેખાઈ શકે છે કે એક પિતાની ઉંમરનો બિન આદિવાસી કોન્ટ્રાક્ટર નાની ઉંમરની આદિવાસી છોકરીઓ સાથે જાહેરમા બીભત્સ કૃત્ય કરતો દેખાય છે. જેથી આ અંગે નિષ્પક્ષ તપાસ માટે કમિટીની નિમણુંક કરી કોન્ટ્રાક્ટર દ્વારા સગીર ગરીબ મજબુર આદિવાસી છોકરીઓ/કામદારોનું શારીરિક શોષણ કે અનૈતિક કામ અટકાવશો અને ન્યાયના હિતમાં યોગ્ય કાર્યવાહી કરવાની એસ.પી. અને કલેક્ટરશ્રી પાસે માંગણી કરી છે.
