જસ એક્ઝોટિકા સોસાયટીમાંથી બે બાઈકની ઉઠાંતરી
(વર્તમાન પ્રવાહ ન્યુઝ નેટવર્ક)
સેલવાસ,તા.15: દાનહના સેલવાસ-નરોલી રોડ ઉપર આવેલ બે સોસાયટીઓના બે ફલેટમાં ચોરીના પ્રયાસ અને એક દુકાનમાંથી રોકડ રકમની ચોરીની થવાની ઘટના બનવા પામી હતી. જ્યારે બાજુની સોસાયટીમાંથી બે જૂની બાઈકોની પણ ઉઠાંતરી કરી ચોરટાઓ ફરાર થઈ ગયા હતા.
પ્રાપ્ત વિગત અનુસાર પ્રમુખ વિહાર ફેઝ-4માં કે બીબ્ડિંગમાં મોડી રાત્રે બે ફલેટમાં ચોરીનો પ્રયાસ થયો હતો જે ફલેટમાં ચોરીનો પ્રયાસ થયેલ એના આજુબાજુના ફલેટના દરવાજાને બહારથી બંધ કરી દેવામાં આવ્યા હતા. આ જ સોસાયટીમાં આવેલ કનૈયા સુપર સ્ટોરનું શટર તોડી એમાંથી રોકડ અંદાજીત 20 હજાર રૂપિયાની ચોરી થઈ હતી. આજ રસ્તા પર જસ એક્ઝોટિકા સોસાયટીમાં નીચે પાર્ક કરવામાં આવેલ બે જૂની બાઈકો પણ ચોરટાઓ ચોરી ગયા હોવાની માહિતી મળી છે. આ ઘટનાની જાણ થતાં સેલવાસ પોલીસની ટીમ પહોંચી હતી અને આજુબાજુના વિસ્તારમાં પણ તપાસ હાથ ધરી હતી અને સોસાયટીના સીસીટીવી ફૂટેજોના આધારે આગળની તપાસ હાથ ધરી છે.
આ ઘટનામાં એ પણ જોવા મળ્યું હતું કે નાઈટ ડયુટી દરમ્યાન સોસાયટીના વોચમેન સૂઈ રહેતા હોવાનું પણ ધ્યાનમાં આવ્યું હતું. આ ઘટના અંગેની ફરિયાદ નોંધી વધુ તપાસ સેલવાસ પોલીસ કરી રહી છે.