(વર્તમાન પ્રવાહ ન્યુઝ નેટવર્ક)
વલસાડ, તા. ૨૧
વલસાડ જિલ્લાના વાપી ખાતે પરિવારનું ગુજરાન ચલાવવા માટે ઘણાં વર્ષોથી વાપી સ્થિત કંપનીમાં નોકરી કરતા મહિલા કર્મચારીને છેલ્લા ત્રણ માસથી વેતન ના ચૂકવાતા ઘરની આર્થિક પરિસ્થિતિ કફોડી બની હતી. તેમજ બાળકો અન્ન વિહોણા બનતા દયનીય પરિસ્થિતિ ઊભી થઈ હતી. છેલ્લા ત્રણ માસથી વેતનના ચૂકવાતાં મુશ્કેલીમાં મુકાયેલ મહિલા કર્મચારીએ અંતિમ ઉપાય તરીકે ૧૮૧ મહિલા હેલ્પ લાઇનમાં પોતાની આપવીતી જણાવી મદદરૂપ બનવા વિનંતી કરી હતી.
જેથી વલસાડ અભયમ રેસ્ક્યું ટીમે કંપની ખાતે પહોંચી તેના મેનેજમેન્ટ સાથે મહિલા કર્મચારીને બાકી વેતન ચૂકવી આપવાં ચર્ચા કરી હતી. અભયમ રેસ્ક્યું ટીમે કંપનીમાં યોગ્ય રજૂઆત કરતાં કંપનીએ ત્રણ માસનો બાકી પગાર ચૂકવી આપ્યો હતો. અભયમે ટીમે મહિલા કર્મચારીને દર માસે નિયમિત વેતન આપવામા આવે જેથી તેઓ કોઈ તકલીફમાં મુકાય નહિ તે બાબતે પણ મેનેજમેન્ટનું ઘ્યાન દોર્યું હતું. બાકી વેતન મળી જતાં મહિલા કર્મચારીએ ટીમનો ખુબ આભાર માન્યો હતો.
