વલસાડ આર.ટી.ઓ. દ્વારા નવી કાર શિરિઝ જીજે 15 સીએન માટે ઓનલાઈન હરાજી કરવામાં આવી હતી
(વર્તમાન પ્રવાહ વાપી બ્યુરો)
વાપી, તા.09: કેટલાક વાહન-કાર માલિકોને ખાસ નંબર માટે ભારે ઘેલછા ધરાવતા હોય છે. હાલમાં વલસાડ આર.ટી.ઓ. દ્વારા જારી કરવામાં આવેલ નવી કાર પાસીંગ સિરિઝ જીજે 15 સીએન માટે ઓનલાઈન પસંદગીના નંબર માટે જાહેર હરાજી કરી હતી. તેમાં અધધ લેખાવી શકાય એટલી બોલી બોલાઈ હતી. આ સિરિઝના 0001 નંબર માટે રૂા.6.21 લાખ અને 0009 નંબર માટે રૂા.5.38 લાખની બોલી બોલાઈ હતી.
પ્રાથમિક રીતે કારની કિંમત જેટલી ખાસ નંબર માટે બોલી બોલનારા પણ પડયા છે. વલસાડ આર.ટી.ઓ. દ્વારા નવી કાર સિરિઝ જીજે 15 સીએન માટે સ્પે.કેટેગરીના નંબરો મેળવવામાટે ઓનલાઈન હરાજી બોલવાની જાહેરાત કરી હતી. આ હરાજીમાં 102 અરજદારોએ ભાગ લીધો હતો તે પૈકી બે અરજદારોએ ખાસ રસ દાખવ્યો હતો. જેમાં 0001 નંબર મેળવવા માટે સૌથી ઊંચી રૂા.6.21 લાખની અને 0009 નંબર માટે રૂા.5.38 લાખની બોલી ઓનલાઈન બોલાઈ હતી. બન્ને અરજદારોએ અધધ રૂપિયા ચૂકવી પોતાની પસંદગીના નંબરો મેળવી લીધા હતા.
