20 ઓક્ટોબર ગુરુવારથી દિવાળી વેકેશનનો પ્રારંભ થયો હતો
(વર્તમાન પ્રવાહ વાપી બ્યુરો)
વાપી, તા.09: વાપી સહિત વલસાડ જિલ્લાની પ્રાથમિક તથા માધ્યમિક અને ઉચત્તર માધ્યમિક શાળાઓ આવતીકાલ તા.10 ને ગુરૂવારથી ખુલી જશે. શાળાના પરિસરો મેદાન અને વર્ગખંડોમાં બાળકોનો કિલ્લોલ ગુંજારવ શરૂ થઈ જશે. તા.20 ઓક્ટોબર ગુરૂવારથી જિલ્લાની શાળાઓમાં દિવાળી વેકેશનનો પ્રારંભ થયો હતો. 21 દિવસના વેકેશન બાદ આવતીકાલથી દ્વિતિય શૈક્ષણિક સત્રનો પ્રારંભ થઈ જશે.
શૈક્ષણિક જગતમાં દ્વિતિય સત્ર ખાસ અગત્યનું હોય છે. ધો.9 માટે શોધ કસોટી 7 ફેબ્રુઆરીમાં લેવામાં આવશે તેમજ ધો.3 થી ધો.12ના વિદ્યાર્થીઓની શાળાઓમાં પરિક્ષા લેવામાં આવે છે. પ્રથમ સત્રમાં આ વર્ષે કુલ 104 દિવસો અને રજાના 21 દિવસો હતા. જ્યારે બીજા સત્રમાં શૈક્ષણિક કાર્યના 137 દિવસો છે. તેમજ રજાના 35 દિવસો છે. ઉલ્લેખનીય છે ખાનગી અને સી.બી.એસ.ઈ. સ્કૂલોએ સોમવારથી બીજા સત્રનો પ્રારંભ કરી દીધો હતો તેથી ગત સોમવારથી નાના ભુલકાઓ સ્કૂલોમાં જતા જોવા મળી રહ્યા હતા.