ચાલક અનાજ જથ્થા માટેના જરૂરી બિલ રજૂ નહી કરતા પોલીસે કાર્યવાહી કરી અટક કરી
(વર્તમાન પ્રવાહ વાપી બ્યુરો)
વાપી, તા.13 : સરકારી રેશનીંગ અનાજનો જથ્થો સગેવગે કરવાના અનેક રસ્તા વેપારીઓ શોધતા રહેતા હોય છે. અથવા જી.એસ.ટી. વગરના બિલો ફાડી બેનંબરી વેપલા પણ સમયાંતરે વલસાડ જિલ્લામાં બનતા રહે છે. તેવો વધુ અનાજનો જથ્થો પોલીસે વલસાડ ધરમપુર રોડ ઉપરથી પકડયો હતો.
પ્રાપ્ત વિગતો અનુસાર વલસાડ રૂરલ પોલીસને મળેલી બાતમી અનુસાર આજે મંગળવારે વલસાડ-ધરમપુર રોડ ઉપર ચેકીંગ કામગીરી હાથ ધરી હતી તે દરમિયાન કચીગામ પાસેથી ધરમપુર જઈ રહેલી ઈકો કારને અટકાવી પોલીસે ચેકીંગ કર્યું હતું. જેમાં કારમાં 6 ગુણ 178 કિલો ઘઉંનો તથા 13 ગુણોમાં 656 કિલો ચોખાનો જથ્થો મળી આવ્યો હતો. આ અનાજના જથ્થા માટે પોલીસે ચાલક પાસેથી જરૂરી બિલો માંગતા રજૂ નહી કરી શકતા અટક કરી કાયદેસરની કાર્યવાહી કરી હતી.
