(વર્તમાન પ્રવાહ ન્યુઝ નેટવર્ક)
ચીખલી(વંકાલ),તા.23
ચીખલી પોલીસ પેટ્રોલિંગમાં હતી તે દરમ્યાન બાતમી મળી હતી કે એક સફેદ કલરનો ટેમ્પો નં. જીજે-12-એવી-5569માં સ્લેબ ભરવાની લોખંડની પ્લેટોની આડમાં દારૂ ભરી પસાર થનાર છે. જે હકીકત બાતમીના આધારે ચીખલી પોલીસે પીપલગભણ ઝાડી ફળીયા પાસે વોચ ગોઠવી હતી. દરમ્યાન બાતમી મુજબનો ટેમ્પો આવતા જેને રોકી તલાસી લેતા અંદરથી વિદેશી દારૂની નાની મોટી બોટલ નંગ-936 કિં.રૂ.1,14,000/- સાથે જોગેન્દ્રર નવીનભાઈ ધો.પટેલ (ઉ.વ-20) (રહે.બામટી ગામ ધોધર ફળીયા તા.ધરમપુર જી.વલસાડ) અને ગણેશ બાબુભાઇ પટેલ (ઉ.વ-43) (રહે.નાંધઇ ગામ પટેલ ફળિયું તા.ખેરગામ જી.નવસારી) એમ બે ને ઝડપી પાડયા હતા. જ્યારે દારૂનો જથ્થો ભરી આપનાર આશિષ ઉર્ફે મિલન બીપીન પટેલ (રહે.નાંધઇ ગામ મંદિર પાસે ખેરગામ જી.નવસારી) તેમજ દારૂનો જથ્થો મંગાવનાર શિવાંગ પટેલ (રહે.ચીખલી કોલેજ આલીપોર જતા રોડ ઉપર અરિહંત માર્બલ પાસે તા.ચીખલી) એમ બે જેટલાને પોલીસ ચોપડે વોન્ટેડ જાહેર કરી પોલીસે ટેમ્પાની કિં.રૂ.1,50,000/-, બે મોબાઈલ કિં.રૂ.10,000 મળી કુલ્લે રૂ.રૂ.2,74,000/- નો મુદ્દામાલ કબ્જે કરી વધુ તપાસ ચીખલી પોલીસ મથકના પીએસઆઈ શ્રી એમ.કે.ગામીત કરી રહ્યા છે.