ખાનવેલ ગ્રામ પંચાયતની આવકારદાયક પહેલઃ પ્રદેશના આદિવાસી સમુદાયને શિક્ષિત બનવાનો આપેલો સંદેશ
(વર્તમાન પ્રવાહ ન્યુઝ નેટવર્ક)
સેલવાસ :ખાનવેલ ગ્રામ પંચાયત દ્વારા લંડન સ્કૂલ ઓફ ઈકોનોમિક્સ એન્ડ પોલિટિકલ સાયન્સથી માસ્ટરની ડીગ્રી પ્રાપ્ત કરનાર કુ.પ્રિયા ભીખુભાઈ ભીમરા અને કુ. પ્રિયંકા ભીખુભાઈ ભીમરાના સન્માનમાં જાહેર રસ્તા ઉપર અભિનંદન આપતા અને શુભકામના પાઠવતા હોર્ડિંગ મુકવાનું આવકારદાયક પગલું ભરવામાં આવ્યું છે.
સંઘપ્રદેશના આદિવાસી સમુદાય માટે ગૌરવરૂપ બનેલ ખાનવેલની બે દિકરીઓ કુ. પ્રિયા અને કુ. પ્રિયંકા ભીખુભાઈ ભીમરાને આદર્શ બનાવી શિક્ષણ ઉપર જોર આપવાનો સંદેશ પણ ખાનવેલ ગ્રામ પંચાયતે પ્રગટ કર્યો છે.
અત્રે નોંધનીય છે કે, દાદરા નગર હવેલી અને દમણ-દીવમાં પ્રશાસક શ્રી પ્રફુલભાઈ પટેલની પહેલથી ઉચ્ચ શિક્ષણના અનેક દ્વારો ખુલી ગયા છે. તેનો ભરપૂર લાભ લઈ પ્રદેશના શોષિત, વંચિત, દલિત, પીડિત અને આદિવાસી સમુદાયે પોતાની ગરીબી નાબૂદ કરવા માટે શિક્ષણને એક શષા બનાવવું જોઈએ. આજે દાદરા નગર હવેલીના આદિવાસી નેતા સ્વ. ભીખુભાઈ ભીમરાએ તેમના તમામ સંતાનોને અપાવેલા ઉચ્ચ શિક્ષણથી તેમના આત્માને પણ શાંતિ મળી રહી હોવી જોઈએ.
