(વર્તમાન પ્રવાહ ન્યુઝ નેટવર્ક)
દમણ, તા.06 : સંઘપ્રદેશ દાદરા નગર હવેલી અને દમણ-દીવમાં હોટલ, હોમસ્ટે તથા બેડ અને બ્રેકફાસ્ટ(સુવાની અને નાસ્તા)ની સગવડ સાથે સંકળાયેલા વ્યવસાયીઓને તેમનું લાયસન્સ પ્રવાસન વિભાગ પાસેથી મેળવી લેવાનું હોય છે. પરંતુ કેટલીક હોટલો, હોમસ્ટે, બેડ અને બ્રેકફાસ્ટના ધંધા સાથે સંકળાયેલા લોકો જરૂરી રજીસ્ટ્રેશન/લાયસન્સ વગર જ પોતાના ધંધાને ચલાવી રહ્યા હોય તેઓ દાદરા નગર હવેલી અને દમણ-દીવ રજીસ્ટ્રેશન ઓફ ટુરિસ્ટ એક્ટ 1982 અંતર્ગત બનેલા નિયમોનું ઉલ્લંઘન કરતા હોવાથી તેઓને પોતાનો ધંધો શરૂ કરતા પહેલાં જરૂરી લાયસન્સ લઈ લેવા પ્રવાસન વિભાગ દ્વારા તાકિદ કરવામાં આવી છે. લાયસન્સ/રજીસ્ટ્રેશન વગર ચાલતા આ પ્રકારના ધંધાઓ સામે કાનૂની કાર્યવાહી કરવાની પણ ચિમકી આપવામાં આવી છે.
દરમિયાન જેઓએ રજીસ્ટ્રેશન કે લાયસન્સ રિન્યુ નહીં કરાવ્યું હોય તેવાઓએ પોતાની હોટલના લાયસન્સને રિન્યુ કરવાની મુદ્દતપછી લાયસન્સની વેલીડીટી ખતમ થઈ જતી હોય છે, તેથી લાયસન્સ રિન્યુ કરવા માટે પણ તાકિદ કરવામાં આવી છે.
