31મી માર્ચ પહેલાં વેરો ભરપાઈ નહી થાય તો ટાંચ, જપ્તી, વોરન્ટની કાર્યવાહી
(વર્તમાન પ્રવાહ વાપી બ્યુરો)
વાપી, તા.23: વાપી નગરપાલિકા દ્વારા વેરા વસુલાતનીકામગીરી હાલમાં ટોપ ગેરમાં ચાલી રહી છે. 31 માર્ચ પહેલાં 100 ટકા વેરા વસુલાતનું અભિયાન ચલાવાઈ રહ્યું છે. આજે વોર્ડ નં.10 સુલપડ વિસ્તારના 150 ઉપરાંત ચાલી માલિકોને 31 માર્ચ પહેલાં કાયદેસર વેરો ભરપાઈ કરવાની નોટિસો અપાઈ છે.
વાપી નગરપાલિકા દ્વારા ચાલુ નાણાકીય વર્ષ 31 માર્ચએ પુરુ થાય તે પહેલાં શહેરમાં મિલકત ધારકો પાસે વેરો વસુલાત કરવાનું અભિયાન તેજ કરી દેવાયું છે. તે સંદર્ભમાં આજે સુલપડ વોર્ડ નં.10 વિસ્તારના 150 ઉપરાંત ચાલી માલિકોને વેરો ભરી દેવા અંગે નોટિસો ફટકારાઈ છે. તેમજ વેરો સમયસર ભરપાઈ નહી થશે તો મ્યુનિસિપલ એક્ટ હેઠળ કાયદેસરની કાર્યવાહી ટાંચ, જપ્તી, વોરન્ટ જેવા કાનુની પગલાં લેવામાં આવશે તેવા જાહેર સાઈન બોર્ડ પણ પાલિકા દ્વારા સુલપડ વિસ્તારમાં લગાવાયા છે. વર્ષ અંતે 100 ટકા વેરા વસુલાતની કામગીરી પાલિકા પૂર્ણ કરવાનું દૃઢ અભિયાન ચલાવી રહેલ છે. ઉલ્લેખનીય છે કે, સુલપડ વિસ્તારમાં રૂમ દીઠ માત્ર 141.00 રૂા. મિલકત વેરો છે તેમ છતાંય ચાલી માલિકો વેરો ભરપાઈ નથી કરી રહ્યા. તેથી પાલિકાએ કાયદેસર પગલાં ભરવાની જાહેર ચિમકી ઉચ્ચારી દીધી છે.
