(વર્તમાન પ્રવાહ ન્યુઝ નેટવર્ક)
દમણ, તા.27 : દમણ પોલીસે દાભેલની એક દુકાનમાં પાડેલા દરોડામાં મોટા પ્રમાણમાં ગાંજાનો જથ્થો બરામદ કરવા સફળતા મળી છે અને આરોપીઓ સામે વિવિધ એનડીપીએસ એક્ટ મુજબ ગુનો નોંધી વધુ તપાસ હાથ ધરી છે.
પ્રાપ્ત માહિતી પ્રમાણે દમણ પોલીસે દાભેલ ખાતે આવેલ મહાવીર ઈલેક્ટ્રોનિક્સ એન્ડ મોબાઈલ શોપ, નેકી કોમ્પલેક્ષ ખાતે દુકાનમાં પાડેલા દરોડામાં ગેરકાયદેસર રીતે રાખવામાં આવેલ અને લોકોને વેચતા ગાંજો જેવા નશાનો મોટા પ્રમાણમાં જથ્થો લગભગ 3.573 કિલોગ્રામ બરામદ કરી આરોપી (1)સંતોષકુમાર અજય પ્રસાદ મહંતો (રહે. સુરેશભાઈની ચાલ, આમલીયા દાભેલ) (2)સુરજ ચમુરૂશા શાહ (રહે.આમલીયા દાભેલ) અને (3)મુન્નાવરઅલી શેખ (રહે.ભેંસરોડ, નાની દમણ)ની એનડીપીએસ એક્ટની 20(બી)(બી), 29 હેઠળ ગુનો નોંધી તમામની ધરપકડ કરવામાં આવી છે. પોલીસે લીલા રંગનો પદાર્થ ગાંજો 3.573 કિ.ગ્રા. અને 4 મોબાઈલ ફોન જપ્ત કર્યા છે.
મળતી માહિતી પ્રમાણે દમણમાં ગાંજા સહિત ચરસ, હેરોઈનજેવા નશાકારક દ્રવ્યોની મોટાપાયે હેરફેર થઈ રહી હોવાની જાણકારી પણ સામે આવી રહી છે. મોટી દમણના ગ્રામ્ય વિસ્તારોમાં પણ ગાંજા જેવા નશાકારક પદાર્થનું સેવન કેટલાક લબરમૂંછિયા યુવાનો દ્વારા થઈ રહ્યું છે. પોલીસે આ બાબતે સખત કાર્યવાહી કરવી જોઈએ એવી માંગણી પણ બુલંદ બની છે.
દમણમાં સટ્ટા-મટકા-જુગારની મોટી ક્લબો કાર્યરત…?: મોટી દમણમાં પણ લેવાતુ બેટિંગ
હવે દમણની ગણના એક સંસ્કારી નગરી તરીકે થઈ રહી છે ત્યારે આ પ્રકારના દૂષણો ઉપર વહેલી તકે નિયંત્રણ મેળવવું જરૂરી
(વર્તમાન પ્રવાહ ન્યુઝ નેટવર્ક)
દમણ, તા.27: દમણમાં સટ્ટા, મટકાના જુગારની સાથે મોટી જુગારની ક્લબો પણ કાર્યરત થઈ હોવાની જાણકારી સામે આવી રહી છે. મોટી દમણમાં પણ કેટલાક બુકીઓ દ્વારા સટ્ટા-મટકાના જુગારનું બેટિંગ લેવાતુ હોવાની પણ માહિતી સામે આવી રહી છે.
પ્રાપ્ત માહિતી પ્રમાણે કેટલાક અસામાજિક તત્ત્વો દ્વારા દમણમાં ખુબ જ ઓર્ગેનાઈઝડ રીતે સટ્ટા-મટકાના જુગારની સાથે જુગારની ક્લબો પણ કાર્યરત થઈ ચુકી છે.
હવે દમણની ગણના એક સંસ્કારી નગરી તરીકે થઈ રહી છે ત્યારે આ પ્રકારના દૂષણો ઉપર વહેલી તકે નિયંત્રણ મેળવવામાં આવે એવી માંગ લોકોમાં થઈ રહી છે.
