(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.10: ચીખલી તાલુકાના કાંગવઈ ગામે શેરડીના ખેતરમાં દીપડો ફરતો હોવાનો વિડીયો વાઈરલ થતા વનવિભાગે તપાસ કરી પાંજરૂ ગોઠવવાની તજવીજ હાથ ધરી હતી.
પ્રાપ્ત માહિતી અનુસાર ચીખલી તાલુકાના કાંગવઈ ગામના હાઈસ્કૂલ રોડ પર આવેલા પરિમલભાઈના શેરડીના ખેતરમાં દીપડો આરામ ફરમાવતો હોવાનો નજરે ચઢતા તેમણે પોતાની કારમાંથી વિડીયો ઉતારતા બાદમાં દીપડાએ ખેતરમાં અંદર તરફ પ્રયાણ કર્યું હતું. જોકે દીપડાની જાહેરમાં અવાર જવરથી સ્થાનિકોમાં ભયનો માહોલ સર્જાવા પામ્યો છે.
કાંગવઈ વિસ્તારમાં દીપડા સાથે બચ્ચા પણ ફરતા હોવાનું સ્થાનિકો જણાવી રહ્યા છે. ત્યારે વન વિભાગ દ્વારા કાંગવઈ વિસ્તારમાં પાંજરૂ ગોઠવવામાં આવે તેવી સ્થાનિકોમાં માંગ ઉઠવા પામી છે.
ચીખલીના આરએફઓ આકાશભાઈ પડશાલાના જણાવ્યાનુસાર કાંગવઈમાં દીપડા અંગેની માહિતી સોશ્યલ મીડિયાના માધ્યમથી મળી છે. જે અંગે તપાસ કરાવી પાંજરૂ ગોઠવવામાં આવશે.
ચીખલી વનવિભાગ દ્વારા 5 થી 7 મે દરમ્યાન દીપડાની વસ્તી ગણતરી કરવામાં આવતા ચીખલી તાલુકામાં 4 અને ગણદેવા જંગલમાં એક મળી કુલ પાંચ જેટલા દીપડા હોવાનું બહાર આવ્યું હતું. દીપડાની ગણતરી પ્રત્યક્ષ દર્શન, પગના પંજા, હગાર અને અવાજના આધારે ગણતરી કરવામાં આવી હતી. જોકે તાલુકા ચોમાસા બાદ અનેક ગામોમાં દીપડાઓની અવર જવર વ્યાપક પ્રમાણમાં જોવા મળી રહી છે. દીપડાઓના એક સ્થળેથીબીજા સ્થળે વિચરણ કરતા હોવાથી અલગ અલગ વિસ્તારમાં અવાર નવાર જોવા મળતા હોય છે.