બે દિવસથી આધેડ ગાયબ રહેતા આધેડની શોધખોધ દરમિયાન ફાંસો ખાધેલી હાલતમાં મળ્યા
(વર્તમાન પ્રવાહ ન્યુઝ નેટવર્ક)
પારડી, તા.14: પારડી તાલુકાના ગોઈમા ગામે વાણિયા ફળિયામાં રહેતા અને રિક્ષા ચલાવી ગુજરાન ચલાવતા કાંતિભાઈ નાનાભાઈ કો. પટેલ ઉ.વ.59નો નાનો દીકરો નિકુંજ વિદેશ જવાનો હોવાથીતેમની પત્ની રીનાબેન મુંબઈ ખાતે ગયા હતા અને ત્યાં સંબંધીને ત્યાં રોકાયા હતા અને બીજો મોટો દીકરો અક્ષય કોન્ટ્રાકટરનું કામ કરતાં હોવાથી તે છેલ્લા પંદરેક દિવસથી દમણ ખાતે રહેતો હતો. કાંતિભાઈ ઘરે એકલા હતા અને છેલ્લા દિવસથી ઘરે હાજર ન મળતા પાડોશમાં રહેતા સંબંધીએ તેમના પિતા ઘરે ના હોવા અંગે મોટો પુત્ર અક્ષયને જાણ કરી હતી અને શોધખોળ કરતાં કાંતિભાઈ તેમના ઘર પાછળ આવેલી આંબા વાડીમાં બારથી પંદર ફૂટ ઉંચી આવેલી ડાળી સાથે નાયલોન દોરી બાંધી ફાંસો ખાધેલી હાલતમાં મળી આવ્યા હતા. જેમને રોહિણા સરકારી હોસ્પિટલ લઈ જવાતા મૃત જાહેર કર્યા હતા. કાંતિભાઈએ કયાં કારણસર આપઘાત કર્યો તે બહાર આવ્યું નથી.
