(વર્તમાન પ્રવાહ ન્યુઝ નેટવર્ક)
સેલવાસ,તા.26: સંઘપ્રદેશ દાદરા નગર હવેલી અને દમણ-દીવના પ્રશાસક શ્રી પ્રફુલભાઈ પટેલના દિશા-નિદેર્શ અને કુશળ માર્ગદર્શનમાં સેલવાસ નગરપાલિકા પ્રમુખ શ્રીમતી રજની શેટ્ટીની અધ્યક્ષતામાં અને ચીફ ઓફિસર શ્રી સંગ્રામસિંહ શિંદેના ખાસ ઉપસ્થિતિમાં નેતૃત્વમાં ‘સ્વચ્છતા હી સેવા મિશન-2024′, ‘સ્વભાવ સ્વચ્છતા’, ‘સંસ્કાર સ્વચ્છતા મિશન’ અંતર્ગત નગરપાલિકા દ્વારા વિવિધ કાર્યક્રમ આયોજીત કરવામાં આવ્યો હતો. જેના અંતર્ગત નગરપાલિકા પરિસર ખાતે ‘સફાઇ મિત્ર સુરક્ષા’ શિબિરનું આયોજન કરવામાં આવ્યું હતું.
આ અવસરે સ્વચ્છતા કર્મચારીઓ અને સુપરવાઇઝરોના આરોગ્યની તપાસ કરવામાં આવી હતી. સાથે સાથે સી.એસ.આર. અંતર્ગત સ્વચ્છતા કર્મચારીઓ માટે ગ્રુપ એક્સિડન્ટ ગાર્ડ પોલીસીનો લાભ પણ આપવામાં આવ્યો હતો. ગ્રુપ એક્સિડન્ટ ગાર્ડ પોલીસી એ એક વ્યાપક વીમા કવચ છે. જે કોઈપણ અકસ્માતની ઘટના કે દુર્ઘટના બાદ સુરક્ષા આપેછે. આ પોલીસી અંતર્ગત દુર્ઘટનામાં થતા નુકસાનને ઓછો કરવા માટે કેટલાક પ્રકારના લાભ મળે છે. આ પોલીસી અંતર્ગત 499 રૂપિયા વર્ષના પ્રીમિયમ પર દસ લાખ રૂપિયાનું વીમા કવચ મળે છે. આ પોલીસીમાં દુર્ઘટનાથી થતુ મોત, સ્થાયી અથવા આંશિક વિકલાંગતા, અંગ વિચ્છેદ અથવા પેરેલિસિસ જેવી સ્થિતિમાં વિમાનો લાભ મળે છે.
અત્રે આયોજીત‘સફાઈ મિત્ર સુરક્ષા’ શિબિરમાં નગરપાલિકાના વોર્ડ કાઉન્સિલરો, આરોગ્ય વિભાગના કર્મચારીઓની ટીમ સહિત નગરપાલિકાના કર્મચારીઓ ઉપસ્થિત રહ્યા હતા.