વી.આઈ.એ., નગરપાલિકા, સ્કૂલ, કોલેજ અને સ્વૈચ્છિક સંસ્થાઓ દ્વારા વિશ્વ યોગ દિવસની ઉજવણી થશે
(વર્તમાન પ્રવાહ વાપી બ્યુરો)
વાપી, તા.20: તા.21મી જૂન એટલે વિશ્વ યોગ દિવસ તરીકે દુનિયાભરમાં ઉજવણી ખુબ ઉત્સાહ અને આદરપૂર્વક કરવામાં આવે છે તે અંતર્ગત આવતીકાલે તા.21મીએ વાપીમાં વી.આઈ.એ. નગરપાલિકા તથા સ્વૈચ્છિક સામાજીક સંસ્થાઓ, સ્કૂલો, કોલેજોમાં વિશ્વ યોગા દિવસની ઉજવણી થનાર છે.
વાપી વી.આઈ.એ. જી.આઈ.ડી.સી. અને નોટિફાઈડ એરીયા ઓથોરીટીના સંયુક્ત આયોજન અંતર્ગત ફાયર સ્ટેશન વી.આઈ.એ. ચાર રસ્તા પાસે સવારે 6:30 કલાકે યોગા દિવસની ઉજવણી કરવામાં આવશે. તેજ પ્રમાણે વાપી નગરપાલિકા દ્વારા કુમારશાળા મેદાન, પાલિકા પાસે પણ વિશ્વ યોગ દિવસ ઉજવણી શિબિરનું આયોજન સવારે 6:00 કલાકે કરવામાં આવ્યું છે. તેથી સાર્વજનિક રીતે સૌને ઉપસ્થિત રહેવા જાહેર આમંત્રણ પાઠવવામાં આવ્યું છે. યોગ એ સ્વાસ્થ્ય માટે ઉપયોગી તો છે જ પણ ભારતના ઋષિ મુનિઓની યોગની હજારો વર્ષની પરંપરાને વડા પ્રધાન નરેન્દ્રમોદીએ વિશ્વ સ્તરે પહોંચતી કરી છે. યુનોમાં રજૂઆત કરી તા.21 જૂનને વિશ્વ યોગ દિવસ તરીકે યુનોએ જાહેરાત કરી છે. આવતીકાલે વડાપ્રધાન મોદી યુનોના હેડક્વાટર્સ થી 140 દેશોમાં યોગ કરાવનાર છે તે ભારત માટે ગર્વ સમાન હકીકત બની રહેશે.