કોન્ટ્રાક્ટરનો લુલો બચાવ : સાત દિવસ રિપેરીંગ કામ કરી દેવાશે
(વર્તમાનપ્રવાહ વાપી બ્યુરો)
વાપી, તા.19: વલસાડ નજીક નેશનલ હાઈવે મછોલી ખાડી બ્રિજ ઉપર બ્રિજમાં ભંગાણ સર્જાતા વાહન વહેવાર પ્રભાવિત થયો હતો.
લગાતાર વરસાદને લઈ નેશનલ હાઈવેની તકલાદી કામગીરી ઠેર ઠેર ઉજાગર થવા લાગી છે. વલસાડથી વાપી સુધી હાઈવે ઉપર ખાડા અને પાણી ભરાવાની જાણે સામાન્ય બાબત બની ચૂકી છે. આજે બુધવારે વલસાડ નજીક નેશનલ હાઈવે મછોલી ખાડી બ્રિજ ઉપર ભંગાણ પડયું હતું. ભંગાણ એટલું જોખમી હતું કે પુલના સળીયા પણ ખુલ્લા થઈ ગયા હતા. ભંગાણને લીધે ટ્રાફિક અવર જવર પ્રભાવિત બનતા પોલીસને ટ્રાફિક કન્ટ્રોલ કરવાની ફરજ પડી હતી. આ બાબતે કોન્ટ્રાક્ટરે લુલો બચાવ કરતા જણાવ્યું હતું કે, દિન સાતમાં રિપેરીંગ કરી દેવામાં આવશે. આવી હાઈવેની ખરાબી ઠેર ઠેર સર્જાઈ ચૂકી છે. બધુ રામ ભરોસે ચાલી રહ્યું છે. ખડકી પાસે, બગવાડા ટોલનાકા નજીક, બલીઠા જેવી અનેક જગ્યાએ હાઈવે ઉપર ખાડાની ભરમાર થઈ ચૂકી છે. છતાં હાઈવે ઓથોરિટી દ્વારા રોડની જાળવણી અંગેની પોલ વરસાદે ખુલ્લી પાડી દીધી છે.
