(વર્તમાન પ્રવાહ ન્યુઝ નેટવર્ક)
દમણ, તા.23: દમણમાં રહેતી એક 12 વર્ષિય સગીર બાળાને લલચાવી પટાવી પોતાના ઘરમાં લઈ જઈ બળાત્કાર કરનાર 61 વર્ષિય આધેડ ઈસમની પોલીસે ધરપકડ કરી છે અને તેની વિરૂદ્ધ નાની દમણ પોલીસ મથકમાં આઈપીસીની 376 અને પોક્સો એક્ટની કલમ 4 અંતર્ગત કેસ નોંધી આગળની કાર્યવાહી હાથ ધરી છે.
પ્રાપ્ત માહિતી પ્રમાણે દમણમાં એક ચાલમાં રહેતી 12 વર્ષિય સગીર બાળા તેના પડોશીના ઘરે રમવા માટે જતી હતી. એક દિવસ તેના પડોશની ચાલમાં રહેતા 61 વર્ષિય આધેડઈસમે સગીર બાળાને ઘરે એકલી જોઈ હતી. આધેડે સગીર બાળાને લલચાવી પટાવી તેણીને હવસનો શિકાર બનાવી હતી. આ ઘટનાને લગભગ 20 દિવસ પસાર થયા બાદ બાળાના પેટમાં દુઃખવા લાગ્યું, જે બાબતે તેના વાલીઓએ વિચાર્યું કે વરસાદની સિઝનના કારણે બાળકીને પેટની બિમારી થઈ હશે. તેઓ ઘરગથ્થું ઈલાજ કરીને તેના દુઃખાવાને બંધ કરવાના પ્રયાસ કરી રહ્યા હતા. પરંતુ દુઃખાવો બંધ નહીં થતાં બાળકીની સારવાર માટે મોટી દમણ સામુદાયિક આરોગ્ય કેન્દ્રમાં ડોક્ટરને બતાવ્યું, જ્યાંથી બાળાની સોનોગ્રાફી કરવા માટે મરવડ હોસ્પિટલમાં મોકલી દીધી. સોનોગ્રાફીમાં ખબર પડી કે સગીરને લગભગ દોઢ મહિનાનો ગર્ભ રહી ગયો છે. 12 વર્ષિય સગીર ગર્ભવતી હોવાની વાત જાણીને તેના માતા-પિતા સ્તબ્ધ રહી ગયા હતા. જિલ્લા હોસ્પિટલ દ્વારા પોલીસ અને બાળ કલ્યાણ સમિતિને કેસની સૂચના આપવામાં આવી અને બાળ કલ્યાણ સમિતિની ટીમે હોસ્પિટલમાં આવીને પીડિતાની પૂછરછ કરી હતી. ત્યારે બાળાએ તેની આપવિતી સંભળાવી હતી. નાની દમણ પોલીસ સ્ટેશનના અધિકારીઓ દ્વારા આઈપીસીની કલમ 376 અને પોક્સો એક્ટની કલમ 4 મુજબ કેસ નોંધીને આરોપીની ધરપકડ કરી છે અને વધુ તપાસ હાથ ધરી છે.
Previous post