આરોપી વિનીત કામેશ્વર પાંડે પાસેથી પોલીસે મોપેડ અને 11 મોબાઈલ સહિત રૂા.1.25 લાખનો મુદ્દામાલ જપ્ત
(વર્તમાન પ્રવાહ વાપી બ્યુરો)
વાપી, તા.09: વાપી વિસ્તારમાં મોબાઈલ સ્નેચીંગના વધી રહેલા મામલાઓ બાદ પોલીસ એલર્ટ થઈ ગઈ હતી. પેટ્રોલીંગ દરમિયાનજીઆઈડીસી પોલીસે હાઈવે હોટલ ખોડીયાર પાસેથી મોબાઈલ સ્નેચીંગ કરતો રીઢો ગુનેગાર ઝડપી પાડી કાયદેસર કાર્યવાહી કરી હતી.
પોલીસ સુત્રો મુજબ હે.કો. વિપુલભાઈ અને સ્ટાફ ગઈકાલે પેટ્રોલીંગમાં હતા ત્યારે જીઆઈડીસી હોટલ ખોડીયાર પાસે બે ઈસમો કોર્ડન કરી એક ઈસમની અંગ ઝડતી કરતા હતા. કાયદાના સંઘર્ષમાં આવેલ બાળ કિશોરની પાસેથી મોપેડની ડીકીમાંથી 7 મોબાઈલ મળી આવ્યા હતા. પોલીસની પૂછપરછમાં જાણવા મળ્યું કે, તેઓ વાપી-દમણ વિસ્તારમાં મોબાઈલ સ્નેચીંગનું કામ કરતા હતા. પોલીસે મોબાઈલ ચોર વિનીત કામેશ્વર પાંડેની ધરપકડ કરી હતી. 75 હજારના કુલ 11 નંગ મોબાઈલ અને 50 હજારનું મોપેડ મળી રૂા.1.25 લાખનો મુદ્દામાલ જપ્ત કર્યો હતો. જીઆઈડીસી પો.સ્ટે.ના બે ગુના ડિટેક્ટ થયા હતા. વિનિત કામેશ્વર બેકાર છે. પંકજભાઈની બિલ્ડીંગમાં રોયલ ગાર્ડન સામે ડાભેલમાં રહેતો હતો. મૂળ બિહારનો વતની છે.