લગ્ન ડેકોરેશનના ગોડાઉનમાં ભરાયો હતો અજગર: 12થી14 ફૂટ લાંબો અને 35થી 40 કિલો વજન ધરાવતો હોવાનું અનુમાન
(વર્તમાન પ્રવાહ ન્યુઝ નેટવર્ક)
પારડી, તા.02: પારડીસ્વાધ્યાય મંડળ રોડ ખાતે આવેલ જલારામ નગરમાં રહેતા અને શિવ ડેકોરેશનના નામે લગ્ન મંડપનો વ્યવસાય કરતા વિનયભાઈએ ગઈકાલે રાત્રે બે વાગ્યે ઘરની બાજુમાં આવેલ ગોડાઉનમાં સાપ આવ્યો હોવાનો ફોન જીવદયા ગ્રુપ પારડીના પ્રમુખ અલી અન્સારીને કરતા તેઓ તાત્કાલિક જલારામ નગર ખાતે પહોંચી જોતા એક વિશાળકાય અજગર જોવા મળ્યો હતો પરંતુ આ અજગર જોતજોતામાં બાજુમાં આવેલ ડેકોરેશનના ગોડાઉનમાં ભરાય ગયો હતો. પરંતું અલીભાઈ ત્યાં હાજર હોય ડર રાખ્યા વિના ગોડાઉન માલિક વિનયભાઈ તથા તેમના માણસોએ આટલી મોડી રાતે ખૂબ મહેનતથી આ ગોડાઉનમાં રાખવામાં આવેલ લાકડાઓ દૂર કરતા લગભગ અડધાથી પોણા કલાકની મહેનત બાદ આ મહાકાય અજગરનું રેસ્કયું કરવામાં સફળતા પ્રાપ્ત થઈ હતી. 12થી 14 ફૂટ લાંબો અને 35થી 40 કિલો વજન ધરાવતા આ અજગરને ફોરેસ્ટ ખાતાને જાણ કરી જંગલમાં છોડવામાં આવશે.
સાથે સાથે એક અપીલ પણ કરવામાં આવે છે કે આવા કોઈ પણ પ્રકારના સરીસૃપ પ્રાણીઓ, કોઈપણ પ્રકારના સાપો જો તમને તમારા ઘર કે અન્ય આજુબાજુ નજરે ચઢે તો તેને ઈજા કે મારી ન નાખતા જીવદયા ગ્રુપ પારડીનો સંપર્ક કરવો, જેથી જીવદયા ગ્રુપના સભ્યો જેમ બને તેમ જલદી આવી સહી સલામત રીતે રેશકયું કરી આવા સાપોને લઈજાય.