એક સાયકલ અને મોપેડ સવારને ટક્કર મારતા એકને ઇજા
(વર્તમાન પ્રવાહ ન્યુઝ નેટવર્ક)
સેલવાસ, તા.05: સેલવાસના આમલી રોડ પર આવેલ સ્ટેટ બેંક ઓફ ઈન્ડિયા(એસ.બી.આઈ.) બ્રાન્ચમાં ચલણ ભરવા આવેલ એક વ્યક્તિ બહાર નીકળ્યા બાદ તેણે પોતાની કારને રિવર્સ લેવાને બદલે સીધી આગળ ચલાવી દેતાં એક સાયકલ સવાર અને મોપેડ સવારને ટક્કર મારી દીધી હતી બાદમાં બેંકના એ.ટી.એમ.માં ઘુસાડી દેવાની ઘટના બની હતી.
પ્રાપ્ત વિગત અનુસાર રામકરણ વર્મા નામના વ્યક્તિ જેઓ સેલવાસના આમલી રોડ ખાતેઆવેલી સ્ટેટ બેંક ઓફ ઈન્ડિયાની બ્રાન્ચમાં ચલણ ભરવા આવ્યા હતા. ત્યારબાદ તેઓ એમની કાર નંબર જીજે-15 સીએન-3887માં સ્ટાર્ટ કર્યા બાદ કારને રિવર્સ ગિયરમાં નાખવાને બદલે સીધી જ આગળ ચલાવી દીધી હતી. જેના કારણે એક મોપેડ સવાર અને સાયકલ સવારને જોરદાર ટક્કર લાગી હતી. ત્યારબાદ કારને અહીંના એસ.બી.આઈ.ના એ.ટી.એમ.માં ઘુસાડી દીધી હતી. આ ઘટનાને કારણે આજુબાજુથી લોકનું ટોળુ ભેગું થઈ ગયું હતું. આ ઘટનામાં એક વ્યક્તિને ગંભીર ઇજા પહોંચતા તેમને ઈમરજન્સી 108 એમ્બ્યુલન્સમાં સારવાર અર્થે સેલવાસની શ્રી વિનેબા ભાવે સિવિલ હોસ્પિટલમાં ખસેડવામાં આવ્યા હતા.
આ ઘટનાની જાણ પીપરીયા આઉટ પોસ્ટને થતાં પોલીસની ટીમ દોડી આવી હતી અને અકસ્માત સર્જનાર કારચાલકની પૂછપરછ કરી હતી. આગળની વધુ તપાસ દાનહ પોલીસે કરી રહી છે.