પ્રશાસકશ્રીના સાતમા આસમાને પહોંચેલા ગુસ્સાની ખબર વાયુવેગે સમગ્ર પંથકમાં પ્રસરતા અધિકારીઓ-કર્મચારીઓએ પોતાના કાર્યાલયને વ્યવસ્થિત કરવાનું શરૂ કરેલું કામ
વેઈટ એન્ટ મેઝરમેન્ટના કાર્યાલયમાં ચાલુ એ.સી.ના કારણે કાર્યાલયમાં પ્રસરેલી સિગારેટની ગંધ અને તોલમાપના સાધનો ઉપર લાગેલા જાળા જોઈ પ્રશાસકશ્રીએ ખોલેલું ત્રીજું લોચન
(વર્તમાન પ્રવાહ ન્યુઝ નેટવર્ક)
દમણ, તા.13: સંઘપ્રદેશના પ્રશાસક શ્રી પ્રફુલભાઈ પટેલ આજે મોટી દમણ ખાતે નિર્માણાધિન સચિવાલય સહિતના પ્રોજેક્ટોના નિરીક્ષણ માટે નિકળ્યા હતા તે સમયે વેઈટ એન્ડ મેઝરમેન્ટ (તોલમાપ) વિભાગની આકસ્મિક મુલાકાત લીધી હતી. તે સમયે સંબંધિત અધિકારી-કર્મચારી ખુરશી ઉપર આરામની મુદ્રામાં હતા અને કાર્યાલયનું એ.સી. પણ ચાલુ હતું, ઉપરાંત કાર્યાલયમાં સિગારેટની ગંધ આવતી હતી. આવી સ્થિતિ નિહાળી પ્રશાસક શ્રી પ્રફુલભાઈ પટેલનો ગુસ્સો સાતમા આસમાને પહોંચ્યો હતો. તેમણે જિલ્લા કલેક્ટર શ્રી સૌરભ મિશ્રાને તાત્કાલિક જવાબદાર અધિકારી-કર્મચારીને સસ્પેન્ડ કરવાનો આદેશ જારી કરી તેમને સૂચિત કરવા નિર્દેશ આપ્યો હતો. પ્રશાસકશ્રીએ વેઈટ એન્ડ મેઝરમેન્ટકાર્યાલયની આકસ્મિક મુલાકાત લીધી હોવાની વાત વાયુવેગે સમગ્ર પંથકમાં પ્રસરતાં અધિકારીઓ, કર્મચારીઓ પણ સાબદા થયા હતા અને પ્રશાસકશ્રી પોતાના કાર્યાલયમાં પણ ક્યારેક આવી શકે એવી સંભાવના નિહાળતા થયા છે. જેના પરિણામે હવે કેટલાક સરકારી કાર્યાલયમાં ઠેર ઠેર જામતા કરોળિયાના જાળા, વેરવિખેર પડેલી ફાઈલો વગેરે સાફ અને સીધી કરવા પણ અધિકારીઓ-કર્મચારીઓ માનસિક રીતે સજાગ બન્યા છે.