(વર્તમાન પ્રવાહ વાપી બ્યુરો)
વાપી, તા.23: આર.કે.દેસાઈ ગૃપ ઓફ કોલેજીસમાં નવરાત્રીનો પર્વની ઉજવણી કરવામાં આવી હતી. સૌ પ્રથમ માતાજીની આરતી દ્વારા સમગ્ર વાતાવરણને ભક્તિમય બનાવી માઁ અંબેમાતાને આરાધ્યા હતા. જેમાં મુખ્ય મહેમાન તરીકે કલ્યાણ બેનરજી (ભૂતપૂર્વ પ્રેસિડેન્ટ ઓફ રોટરી ઈન્ટરનેશનલ)ને સંસ્થાના ચેરમેન મિલન દેસાઈએ શાલ ઓઢાડી પુષ્પગુચ્છ આપી સ્વાગત કરી આવકાર્યા હતા તથા અન્ય મહેમાનો વીઆઈએ પ્રમુખ સતિષભાઈ પટેલ, વાપી નોટિફાઈડ ચેરમેન હેમંતભાઈ પટેલ, યોગેશ કાબરિયા, કલ્પેશ વોરા હાજર રહી વિદ્યાર્થીઓને પ્રગતિના પંથે આગળ વધવા માટે આશ્વાસન આપી ગરબા રમવા માટે અભિનંદન પાઠવ્યા હતા. ખૈલાયાઓમાં છુપાય રહેલ વિવિધ કલા કૌશલ્ય બહાર લાવી શકે એ માટે ગરબાની સ્પર્ધાઓ રાખવામાં આવી હતી. જેમાં નિર્ણાયક તરીકે કેવલ માહ્યાવંશી અને પૂજા ટંડેલએ ભૂમિકા ભજવી હતી. બેસ્ટ ડ્રેસ, બેસ્ટ એક્શન જેવી સ્પર્ધાઓ યોજવામાં આવી હતી. જેમાં પ્રોત્સાહિત સ્વરૂપે 19 વિદ્યાર્થીઓને ઈનામ પણ આપવામાં આવ્યું હતું અને આ સમગ્ર કાર્યક્રમ કોલેજના સાંસ્કૃતિ મંત્રી મંડળના નેજા હેઠળ યોજવામાં આવ્યો હતો. આ સુંદર આયોજન કરવા બદલ સંસ્થાના ચેરમેન મિલન દેસાઈએ શુભેચ્છા પાઠવી હતી.
