(વર્તમાન પ્રવાહ ન્યુઝ નેટવર્ક)
દમણ, તા.29
પ્રધાનમંત્રી શ્રી નરેન્દ્રભાઈ મોદીના આશીર્વાદ અને સંઘપ્રદેશના પ્રશાસક શ્રી પ્રફુલભાઈ પટેલના અથાક પ્રયાસથી દમણની મરવડ હોસ્પિટલને જિલ્લા હોસ્પિટલમાં રૂપાંતરિત કરી 300 બેડની હોસ્પિટલના નિર્માણનું કાર્ય શરૂ થઈ રહ્યું છે.
દમણની મરવડ જિલ્લા હોસ્પિટલમાં આરોગ્ય, નિદાન, ચિકિત્સા તથા શષાક્રિયા સહિતની વિવિધ સુવિધાઓ સાથે 300 બેડની જિલ્લા હોસ્પિટલ માટે નવી જગ્યાનું બાંધકામ શરૂ કર્યું છે. પ્રશાસને ફેઝ-3 અને ફેઝ-4 માટે બાંધકામની જગ્યા બનાવવા મરવડ હોસ્પિટલના ટ્રોમા, આઈસીયુ અને વોર્ડનું ડિમોલીશન કરવાનું હોવાથી મરવડ હોસ્પિટલની સુવિધા મોટી દમણ સી.એચ.સી.માં ખસેડવામાં આવી છે.
મરવડ હોસ્પિટલનો ઓપીડી વિભાગ આવતી કાલ તા.30મી ઓક્ટોબર, 2023થી સી.એચ.સી. મોટી દમણમાં શિફટ થશે અને સી.એચ.સી. મોટી દમણમાં ઈન્ડોર, આઈસીયુ અને એનઆઈસીયુની સુવિધા ધીમેધીમે કાર્યરત કરાશે. તેથી દમણ અને આસપાસના વિસ્તારોની સામાન્ય જનતાને મરવડ હોસ્પિટલની તમામ સુવિધાઓ આવતી કાલ તા.30મી ઓક્ટોબર, 2023થી કાર્યરત થઈ રહી હોવાની જાણકારી આરોગ્ય વિભાગ દ્વારા આપવામાં આવી છે.
