અકસ્માતમાં કારને થયેલું મોટું નુકસાન, જાનહાની ટળીઃ ટેમ્પોચાલક ફરારઃ પોલીસે ટેમ્પોચાલકની આદરેલી શોધખોળ
(વર્તમાન પ્રવાહ ન્યુઝ નેટવર્ક)
સેલવાસ,તા.09: દાદરા નગર હવેલીના સેલવાસ-નરોલી રોડ પર યાત્રી નિવાસ નજીક રિંગ રોડ પરના બ્રિજ નીચે ક્રીએટા કાર અને ટેમ્પો વચ્ચે જોરદાર અકસ્માત થયો હતો. જેમાં કારના આગળના ભાગનો ભૂક્કો વળી ગયો હતો જ્યારે કારચાલક સહિત તેમાં સવાર વ્યક્તિઓનો સદ્ભાગ્યે ચમત્કારિક બચાવ થયો હતો.
પ્રાપ્ત માહિતી પ્રમાણે ક્રીએટા કાર નંબર ડીડી-01 સી-7811 સેલવાસ-નરોલી રોડ પર યાત્રી નિવાસ નજીક રિંગ રોડ પરના બ્રિજ નીચે નરોલી રોડ તરફ વળાંક લઈ રહી હતી, તે સમયે સામેથી ઝડપથી ટેમ્પો આવી રહ્યો હતો. જેની કાર સાથે જોરદાર ટક્કર વાગી હતી. ક્રીએટા કારનંબર ડીડી-01-સી-7811 જેમાં ત્રણ વ્યક્તિ સવાર હતા. આ અકસ્માતમાં કારને ઘણું નુકસાન થયું હતું. પરંતુ કાર ચાલક સહિત સાથે સવાર અન્ય બે વ્યક્તિઓને કોઈપણ ઈજા કે જાનહાનીની ઘટના બનવા પામેલ નથી.
અકસ્માત બાદ ટેમ્પો ચાલક ફરાર થઈ ગયો હતો. ઘટનાની જાણ પોલીસને થતાં તેમની ટીમ ઘટના સ્થળે ધસી આવી હતી અને ટેમ્પો ચાલકને ગોતવાની તજવીજ હાથ ધરી હતી. ઘટના અંગેની આગળની વધુ તપાસ દાનહ પોલીસ કરી રહી છે.
