દમણવાડા ગ્રામ પંચાયત દ્વારા ઓર્ગેનિક ખેતીને પ્રોત્સાહન આપવા ખેડૂતોને પોતાના ખેતરમાં જૈવિક ખાતરના ઉત્પાદનની પ્રક્રિયા સમજાવાશે
(વર્તમાન પ્રવાહ ન્યુઝ નેટવર્ક) દમણ, તા.19
દમણવાડા ગ્રુપ ગ્રામ પંચાયત દ્વારા આજે પંચાયત વિસ્તારના કેટલાક ખેડૂતોને વર્મી કમ્પોસ્ટના બેડ આપી તેમને ઓર્ગેનિક ખેતીનો પ્રયોગ કરવા જરૂરી સલાહ સૂચન પણ આપ્યા હતા.
ગયા વર્ષે તોક્તે વાવાઝોડાના કારણે ગ્રામ્ય રસ્તા ઉપર પડેલા પાંદડા, ડાખળીઓ તેમજ અન્ય કચરા-કુટામાંથી વર્મી કમ્પોસ્ટ બનાવવાના શરૂ કરેલા પ્રયોગનું આજે એક વર્ષ પૂર્ણ થતા તેનેહવે લોકોના ઘર સુધી લઈ જવાનો સંકલ્પ વ્યક્ત કરાયો હતો.
દમણવાડા ગ્રામ પંચાયતની ટીમ આવતા દિવસોમાં પોતાના વિસ્તારના પ્રગતિશીલ અને જૈવિક ખેતી કરવા ઈચ્છુક ખેડૂતોની પાસે જઈ તેમને વર્મી કમ્પોસ્ટ બેડ આપી ખાતર તૈયાર કરવા માટેની સમજ પણ આપવામાં આવશે અને પંચાયત દ્વારા સમય સમય ઉપર મોનિટરિંગ પણ કરાશે. જેના કારણે દમણવાડા ગ્રામ પંચાયત વિસ્તારના ખેડૂતો પ્રાયોગિક ધોરણે પોતાના ખેતરમાં જૈવિક ઉત્પાદન તરફ વળે એ પ્રકારના પ્રયાસો હોવાનું સરપંચ શ્રી મુકેશ ગોસાવીએ જણાવ્યું હતું.
આજે પ્રાયોગિક ધોરણે કરાયેલા વર્મી કમ્પોસ્ટ બેડ પ્રસંગે સેક્રેટરી શ્રી નિખિલ મિટના, જે.ઈ.શ્રી વિપુલ રાઠોડ, શ્રી રોહિત ગોહિલ સહિત કેટલાક પ્રગતિશીલ ખેડૂતો પણ ઉપસ્થિત રહ્યા હતા.
