જુના ફાટકથી સીધી અવર જવર ઝંડાચોક અતિ સુલભ બની જશે
(વર્તમાન પ્રવાહ વાપી બ્યુરો)
વાપી, તા.09: વાપીમાં ચોમાસા પછી વિકાસ કામોમાં તેજીની રફતાર પકડી લીધી છે. અનેક વિકાસ કામો પૈકી અતિ જરૂરી એવા વાપી જુના ફાટકથી ઝંડાચોક સુધીના રેલવે અંડરપાસની કામગીરી પુરઝડપે પ્રગતિમાં છે. આગામી બે-ત્રણ માસમાં કામગીરી પૂર્ણ થઈ જશે.
વાપીમાં એક પછી એક વિકાસ કામો ચોમેર ચાલી રહ્યા છે તે પૈકી જુના ફાટકથી ઝંડાચોક સુધીનો રેલવે અંડરપાસની કામગીરી ઝડપથી આગળ વધી રહી છે. આગામી એકાદ અઠવાડિયામાં રેલવે પાટા નીચેની કામગીરી શરૂ થઈ જશે. ગુંજન, વૈશાલી, કોપરલી, છીરીથી આવતા જતા લોકો નજીકના સમયે જુના ફાટકથી સીધા વાપીમાં અવર જવર કરી શકશે. પરિણામે નવા બની રહેલા રેલવે ફલાય ઓવર ઉપરનું ટ્રાફિક ભારણ ઘટી જશે. આમ પણ આ પુલનો ઉપયોગ કરવા ઈમરાનનગર સુધી લાંબા થવું પડે તેવી ડિઝાઈન છે. તેથી વૈશાલી-ગુંજનના વાહન ચાલકો જુના રેલવે ફાટકથીનવા રેલવે અંડરપાસ થઈને વાપીમાં અવર જવર કરી શકશે. વાપીમાં અનેક વિકાસ કાર્યો તેજીમાં હાલમાં ચાલી રહ્યા છે તે પૈકી હાઈવે મામલતદાર કચેરી બલીઠા પાસે 100 બેડની સિવિલ હોસ્પિટલની કામગીરી ચાલુ છે. તદ્દઉપરાંત હાઈવે બલીઠા સર્વિસ રોડ પણ પહોળો થઈ રહ્યો છે. આગામી સમયે વાપી સંપુર્ણ સુવિધા યુક્ત નગર બની જશે.