(વર્તમાન પ્રવાહ ન્યુઝ નેટવર્ક)
સેલવાસ, તા.19: સેલવાસના ક્રિષ્ના હાઈટ્સ સોસાયટીના નવમા માળે સફાઈનું કામ કરતી યુવતીએ કોઈક અગમ્ય કારણોસર ઉપરથી છલાંગ લગાવી દીધી હતી. નીચે જોરદાર રીતે પટકાતા યુવતીનું ઘટના સ્થળ પર જ મોત થતા ભારે ચકચાર મચી જવા પામી હતી.
પ્રાપ્ત વિગત પ્રમાણે જાગુબેન (ઉ.વ.20) રહેવાસી દાદરા. જેઓ એમના માસા- માસી સાથે ક્રિષ્ના હાઈટ્સ બિલ્ડિંગના નવમા માળે ફલેટમાં સાફ-સફાઈનું કામ કરે છે. જેઓ સવારે અહીં પોતાનું કામ પતાવી જાગુબેનના માસા-માસી લિફટમાં નીચે ઉતરી ગયા હતા, પરંતુ જાગુબેન નવમા માળે જ ઉભી હતી અને એના હાથમાંના ઝાડુને સાઈડ પર ફેંકી અચાનક બિલ્ડિંગની ગેલેરીમાંથી નીચે ઝંપલાવી દીધું હતું. નીચે જમીન પર પટકાતા માથાના અને શરીરના ભાગે ગંભીર ઇજા થવાને કારણે તેણીનું ઘટના સ્થળ પર જ મોત થયું હતું. આ ઘટનાને જોતા સોસાયટીમાં રહેતા લોકોમાં પણ ફફડાટ ફેલાઈ ગયો હતો.
ઘટનાની જાણ સોસાયટીના પ્રમુખશ્રીએ પોલીસને કરતા સેલવાસ પોલીસની ટીમ આવી પહોંચી અને મૃતક જાગુબેનની લાશનો કબ્જો લઈ પોસ્ટમોર્ટમ(પી.એમ.) માટે સિવિલ હોસ્પિટલમાં લઈ જવામાં આવી હતી. ઘટના અંગેની સેલવાસ પોલીસે સીસીટીવીફુટેજના આધારે ફરિયાદ નોંધી વધુ તપાસ હાથ ધરી છે.
