વલસાડ કમલમમાં પ્રદેશ નિરીક્ષકોએ સેન્સ લીધી, ડો.કે.સી. પટેલ, જીતુ ચૌધરી, ઉષાબેન પટેલ, ડો.ડી.સી. પટેલ સહિત 9 લાઈનમાં
(વર્તમાન પ્રવાહ વાપી બ્યુરો)
વાપી, તા.27: આગામી મે મહિનામાં યોજાનારી લોકસભાની ચૂંટણી પૂર્વે ભાજપએ ઉમેદવારોની પસંદગી અંગે કવાયત હાથ ધરી છે. ગુજરાતની તમામ 26 બેઠકો ઉપર ભાજપના ઉમેદવારો પસંદગી કરવા માટે પ્રદેશ નિરીક્ષકોએ સેન્સ લેવાની પ્રક્રિયા હાથ ધરી દીધી છે તે અંતર્ગત વલસાડ-ડાંગની બેઠક માટે ઉમેદવારની પસંદગી અંગે વલસાડ કમલમમાં ગઈકાલે પ્રદેશ ભાજપ નિરીક્ષકોએ સેન્સ લીધી હતી. જેમાં નવ જેટલા નેતાઓએ ચૂંટણી લડવાની દાવેદારી નોંધાવી હતી.
લોકસભાની ગુજરાતની 26એ 26 બેઠકો ભાજપ અંકે કરવા માટે રણનિતી ઘડી રહી છે તેથી સક્ષમ ઉમેદવારોની શોધ પ્રક્રિયા હાથ ધરવામાં આવી છે. વલસાડ-ડાંગ બેઠક માટે નિરીક્ષકોએ વલસાડ કમલમમાં ગતરોજસેન્સ લીધી હતી. જેમાં 9 ટિકિટ વાંચ્છુ નેતાઓએ દાવેદારી નોંધાવી છે. વર્તમાન સાંસદ, ડો.કે.સી. પટેલ, ધારાસભ્ય જીતુભાઈ ચૌધરી, પ્રદેશ ભાજપ ઉપાધ્યક્ષ ઉષાબેન પટેલ, મહેન્દ્ર ચૌધરી, ડો.ડી.સી. પટેલ, યોગેશ પટેલ, પ્રવિણ પટેલ, ડો.હેમંત પટેલ, ગણેશ બિહારી મળી કુલ નવ નેતાઓએ ઉમેદવારી માટે દાવા કર્યા હતા. ઉમેદવાર અંગે ભાજપ પ્રદેશ નેતાની ટીમ આખરી મહોર મારશે. જોવુ એ રહેશે કે આ નવ ઉમેદવારોની લાઈનમાંથી પ્રદેશ ભાજપ કોને વરમાળા પહેરાવે છે.
