સરપંચ મુકુંદ પટેલ ભાજપ સમર્પિત સરપંચ હોવા છતાં અનંત પટેલ સાથેની મુલાકાતથી રાજકારણ ગરમાયું
(વર્તમાન પ્રવાહ વાપી બ્યુરો)
વાપી, તા.21: વલસાડ જિલ્લામાં લોકસભા ચૂંટણીનો માહોલ આરંભાઈ ચૂક્યો છે. ભાજપ-કોંગ્રેસના ઉમેદવારોની ડોર ટુ ડોર અને ગામડાઓમાં પ્રચાર માટેની દોડધામ ધમાલ આરંભાઈ ચૂકી છે. આ સમયગાળામાં વલસાડ જિલ્લા બેઠકના કોંગ્રેસ ઉમેદવાર અનંત પટેલનું વલસાડ સેગવી પંચાયતના ભાજપ (સમર્થિત) સરપંચ મુકુંદ પટેલના નિવાસ સ્થાને સન્માન સાથે હારતોરા પહેરાવી મોં મીઠું કરવાની તાજી ઘટેલી ઘટનાને લઈ રાજકારણ ગરમાઈ જવા પામ્યું છે.
સેગવી ગામના સરપંચ મુકુંદ પટેલ ભાજપના સમર્થિત સરપંચ છે. ભાજપ સાથે સંકળાયેલા છે. તેમ છતાં કોંગ્રેસ લોકસભાના ઉમેદવાર અનંત પટેલને નિવાસ સ્થાને બોલાવી સત્કાર સન્માન કરવામાં આવતા જ જિલ્લાના ભાજપમાં મુદ્દો ગરમાઈ જવા પામ્યો છે. ચૂંટણીમાં અનેક રંગ જોવા મળે છે. કંઠીઓ એકબીજા પક્ષની પહેરી લેવાતી હોય છે. કંઈક તેવો અણસાર સેગવીના સરપંચ મુકુંદ પટેલએ આપ્યો હોય તેવું નિર્દિષ્ઠ થયું છે. બીજી તરફ ભાજપ આગેવાનો પણ માથું ખંજવાળી રહ્યા છે કે આ શું બન્યું? રાજકારણમાં બધુ શક્ય છે તેવું સેગવી ગામે જોવામળ્યું છે.
