રોટરી પરિવાર અને લોહાણા યુવક મિત્ર મંડળ દ્વારા રક્તદાન કેમ્પ આયોજન : નાણામંત્રી કનુભાઈ દેસાઈ ઉપસ્થિત રહ્યા
(વર્તમાન પ્રવાહ વાપી બ્યુરો)
વાપી, તા.19: વાપી નેશનલ હાઈવે વૈશાલી ચોકડી પાસે આવેલ હોટલ પેપીલોનમાં રક્તદાન કેમ્પ યોજાયો હતો. જેમાં ઉત્સાહપૂર્વક રક્તદાતાઓએ રક્તદાન કરતા સાંજે 5 કલાક સુધીમાં 483 યુનિટ રક્તદાન થયું હતું.
રોટરી પરિવાર અને લોહાણા મિત્રમંડળ તથાહોટલ પેપીલોન પરિવાર દ્વારા રામ નવમીના પવિત્ર શુભ દિને મહા રક્તદાન કેમ્પનું આયોજન કરવામાં આવ્યું હતું. કેમ્પમાં મુખ્ય અતિથિ તરીકે રાજ્યના નાણામંત્રી કનુભાઈ દેસાઈ ઉપસ્થિત રહીને રક્તદાતાઓને પ્રોત્સાહન પુરુ પાડયું હતું. રોટરી પરિવાર અને લોહાણા સામાજીક સંસ્થાઓના સહકાર અને નોંધનીય પુરુષાર્થ થકી રક્તદાન કેમ્પ સફળ રહ્યો હતો. ઉલ્લેખનીય છે કે પેપીલોન પરિવાર તેની સામાજીક સેવાના ભાગ રૂપે પ્રતિ વર્ષ રક્તદાન કેમ્પનું આયોજન કરે છે. રક્તદાન મહાદાન છે. જે અનેક જીંદગીનો સંઘર્ષ કરતા દર્દીઓને નવજીવન આપે છે. વાપીમાં રક્તદાન કેમ્પની સેવાઓ નિરંતર ચાલતી રહે છે.