હજુ તો ચોમાસાનો પ્રારંભ જ છે ત્યારે જ વાપીના હાલ બેહાલ થઈ રહ્યા છે : પાલિકાનું મૌન લોકોને અકળાવી રહ્યું છે
(વર્તમાન પ્રવાહ વાપી બ્યુરો)
વાપી, તા.21: વાપી વિસ્તારમાં હજુ ચોમાસાનો માત્ર પ્રારંભ થયો છે ત્યાં શહેરમાં વરસાદી ખાના ખરાબી શરૂ થઈ ચૂકી છે. વાપી ચલા રોડ ઉપર ગોલ્ડ કોઈન સર્કલ પાસે ગત રાત્રે રોડ ઉપર થયેલા કાદવ કીચડને લઈ 40 જેટલા ટુવ્હિલર ચાલકો સ્લીપ થઈ ગયા હતા. જેને લઈ વાહન ચાલકો લાલધૂમ થઈ ગયા હતા.
વાપી માટે સન 2024નું ચોમાસું આકરુ અને મુશ્કેલી ભર્યુ રહેશે. તેનો પરચો પહેલા જ વરસાદમાં મળી ગયો છે. ગતરાત્રે ગોલ્ડ કોઈન સર્કલ ઉપર થયેલ બેફામકાદવ કિચ્ચડને લઈ ટપોટપ વાહનો ખાસ કરીને ટુવ્હિલરો સ્લિપ થઈ ગયા હતા. એક-બે-ત્રણ નહિ પણ 40 જેટલા બાઈક અને મોપેડ સ્લિપ થયા હતા. જેમાં તો કેટલાકના હાડકા ભાંગ્યા હતા તો કેટલાકને નાની મોટી ઈજાઓ થતા હોસ્પિટલ ભેગા થવાનો વારો આવ્યો હતો. આથી કફોડી સ્થિતિ મોપેડ લઈ બાળકો સાથે નિકળેલી મહિલાઓની બની હતી. બાળકો સાથે મહિલા પણ કાદવમાં સ્લીપ ખાઈ પટકાતી જોવા મળી હતી. હજુ તો ચોમાસાની શરૂઆથ જ છે ત્યાં હાલત બગડી રહી છે. આ રોડ ઉપર બની રહેલ રેલવે ફલાય ઓવરનું કામ અધુરુ પડયું છે. જેના ખાડાઓની માટી છેક ટાયરે ચોંટી ગોલ્ડ કોઈન સર્કલ સુધી આવી રહી છે. પરિણામે કાદવ કીચ્ચડ થઈ ગયો છે. પાલિકાની બેદરકારી છતી થઈ છે. મોડી રાત્રે પોલીસ બેટરીથી ભય સુચક સિગ્નલ આપતી જોવા મળી હતી. પણ આ તો શરૂઆત છે, આગળની ઉભી થનાર સ્થિતિ માટે સાવધાન બની જજો.
