વલસાડ, દમણ બાદ હવે વાપીમાં પણ યુવાનોની સ્ટંટની ઘેલછા :
પોલીસ કાર્યવાહીની માંગ ઉઠી
(વર્તમાન પ્રવાહ વાપી બ્યુરો)
વાપી, તા.05: વર્તમાન સમયની જનરેશનને જોખમી સ્ટંટ જોખમી સેલ્ફીઓ લેવાની ગાંડપણની હદ સુધી ઘેલછા વારંવાર જોવા મળી રહી છે. આજે શુક્રવારે બપોરે વાપી આશાધામ સ્કૂલ રોડ ઉપર એક યુવાને પેસેન્જર ભરેલી રીક્ષામાં સ્ટંટ કર્યો હતો. જેથી રાહદારીઓ અને ટુવ્હિલર ચાલકો માટે સરેઆમ યુવાને જોખમ ઉભુ કર્યું હતું.
વાપી આશાધામ સ્કૂલ રોડ ઉપર આજે મુસાફરો ભરેલી રીક્ષામાં એક યુવાને સ્ટંટ કર્યો હતો. ખુદ માટે તો જોખમી સ્ટંટ હતો જ પરંતુ રાહદારી અને ટુવ્હિલર ચાલકો માટે પણ સલામતિ જોખમાઈ હતી. થોડા સમય પહેલાં વલસાડ-દમણમાં જોખમી યુવાનો દ્વારા જોખમી સ્ટંટના બનાવો પ્રકાશમાં આવ્યા હતા. જો કે વલસાડમાં પોલીસે કાયદેસરની કાર્યવાહી કરી હતી. વલસાડ જેવી વાપી પોલીસ સ્ટંટબાજ યુવાનને શોધી કાનૂની કાર્યવાહી કરે તેવી પ્રબળ માંગ ઉઠી છે. જાહેર સલામતિ માટે પણ આવા સ્ટંટ માફ કરી ના શકાય. રસ્તે ચાલતા લોકો પણ મુસીબતમાં મુકાઈ શકે છે. આજકાલની નવી જનરેશનને શાન ઠેકાણે લાવવાનો સમય પાકી ગયો છે.
