પારડી પોલીસે મૃતદેહનો કબજો લઈ પીએમ કરાવી હાથ ધરી વધુ કાર્યવાહી
(વર્તમાન પ્રવાહ ન્યુઝ નેટવર્ક)
પારડી, તા.04: પારડીના ઓરવાડ નેશનલ હાઇવે નંબર 48 પર ગત રાત્રીના પૂરપાટ ઝડપે જતા એક વાહને 53 વર્ષીય આધેડને અડફેટમાં લઈ તેના માથાના ભાગેથી વાહન હંકારી જતાં આધેડનું ઘટના સ્થળે કમકમાટી ભર્યું મોત નીપજ્યું છે. પારડી પોલીસને જાણ થતાં મૃતદેહનો કબજો લઈ પીએમ કરાવી અજાણ્યા વાહન ચાલકને શોધવાની કવાયત હાથ ધરી છે.
પારડી તાલુકાના ઓરવાડ ખાતે પપ્પુભાઈના ભંગારના ગોડાઉનમાં કામ કરી ત્યાં જ રહેતા મૂળ યૂપીના ગોપાલ હરીચંદ્ર શ્રીવાસ્તવ ઉવ 53 જે ગત રોજ મંગળવારના રોજ ગોડાઉન પર કામ પૂર્ણ કરી ઓરવાડ દિનેશભાઈની ચાલ ખાતે રહેતા તેના સગા ભાઈ ઘનશ્યામલાલને ગયો હતો. જ્યાંથી તે રાતે પોણા અગિયારેક વાગ્યે પરત ગોડાઉન પર ચાલતા આવી રહ્યા હતા ત્યારે ઓરવાડઅનાવિલ હોલની સામે વલસાડથી વાપી જતાં નેશનલ હાઇવેના ટ્રેક પરથી પુરપાટ ઝડપે જતા એક વાહને ગોપાલભાઈને અડફેટમાં લીધા હતા અને તેના માથાના ભાગેથી વાહનનું ટાયર ચઢી જતાં ઘટના સ્થળે મોત નીપજ્યું હતું. આ બનાવની જાણ પારડી પોલીસને થતાં ઘટના સ્થળે ધસી જઈ મૃતદેહનો કબજો લઈ ઓરવાડ ખાતે બુધવારના રોજ પીએમ કરાવી અકસ્માત સર્જી ભાગી છૂટેલા વાહન અને ચાલકને શોધવા માટે આજુબાજુ વિસ્તારના ઘ્ઘ્વ્સ્ કેમેરા ચેક કરવાની કામગીરી હાથ ધરી છે.
