(વર્તમાન પ્રવાહ ન્યુઝ નેટવર્ક)
દીવ, તા.18
‘આઝાદીકા અમળત મહોત્સવ’ની ઉજવણીના ભાગરૂપે તેમજ દીવ જિલ્લા સમાહર્તા શ્રીમતિ સલોની રાયના દિશાનિર્દેશ અને માર્ગદર્શન હેઠળ આજરોજ જિલ્લા બાળ સુરક્ષા એકમ, દીવ તથા શિક્ષણ વિભાગ દીવના સંયુક્ત પ્રયાસોથી દીવ તથા ઘોઘલાની સરકારી માધ્યમિક અને ઉચ્ચતર માધ્યમિક શાળામાં અભ્યાસ કરતી 200 બાળકીઓ માટે દીવ કિલ્લા ખાતે લાઈટ અને સાઉન્ડ શોબતાવવા માટેનું આયોજન કરવામાં આવેલ હતું.
જેમાં સાંજના 06:00 થી 06:30ના શોમાં 100 બાળકીઓ અને 06:30 થી 07:00ના શોમાં 100 બાળકીઓ એમ બે બેંચમાં મળી કુલ 200 બાળકીઓને દીવ કિલ્લા ખાતે લાઈટ અને સાઉન્ડ શો બતાવવામાં આવેલ હતો. આ કાર્યક્રમનું આયોજન કરવાનો મુખ્ય ઉદ્દેશ્ય સરકારી માધ્યમિક અને ઉચ્ચતર માધ્યમિક શાળામાં અભ્યાસ કરતી બાળકીઓ દીવ જિલ્લાની વિરાસતોને નિહાળી પોતાના જ્ઞાનમાં વધારો કરે અને સાથે-સાથે આ વિરાસતોને નિહાળ્યા બાદ તેમાંથી પ્રેરણા મેળવે તેવો હતો.
જિલ્લા બાળ સુરક્ષા એકમ, દીવ તથા શિક્ષણ વિભાગ દીવના સંયુક્ત પ્રયાસો દ્વારા આયોજિત આ કાર્યક્રમને સફળ બનાવવામાં દીવ જિલ્લા પોલીસ અધિક્ષક શ્રી અનુજ કુમાર, સહાયક શિક્ષણ નિયામક શ્રી ડી.ડી. મન્સૂરી, પર્યટન અધિકારી શ્રી પ્રશાંત જોશી વગેરે અધિકારીઓ તેમજ જી.એચ.એસ.એસ. દીવ તથા ઘોઘલાના હેડ માસ્તરો તેમજ શિક્ષકોએ પોતાનો સહયોગ અને યોગદાન આપ્યું હતું.