(વર્તમાન પ્રવાહ ન્યુઝ નેટવર્ક) પારડી, તા.31
ત્રણેય જેટિંગ મશીનો ઓડિટોરિયમ પાછળ પાર્ક કર્યા હતા. છેલ્લા કેટલાય દિવસો દરમ્યાન પારડીમાં એક ધારી ચોરીને લઈ પારડી પોલીસની ખાસ્સી એવી બદનામી થઈ હતી. જેને લઈ પોલીસે પણ કડક હાથે સમગ્ર ગામમાં ચેકિંગ હાથ ધરતા છેલ્લા બે દિવસથી ઘરફોડ ચોરી બંધ થતા નગરજનો તથા પોલીસે રાહતનો દમ લીધો હતો પરંતુ ચોરોએ પણ પોતાનો માર્ગ બદલી ઘરફોડ ચોરીના બદલે વાહનોમાંથી સાધાનો ચોરવાનું શરૂ કર્યું છે.
પારડી નગર પાલિકાએ ડ્રેનેજ કામગીરી માટે વસાવેલા GJ 15 G 1497 નંબરનું મોટું જેટિંગ મશીન અને બે નાના GJ15 G 1498 અને GJ 15 G 1499 નંબરના જેટિંગ મશીન પાલિકા કર્મચારીઓએ શનિવારના રોજ ડ્રેનેજ કામગીરીમાં લીધા બાદ નેશનલ હાઇવે ખાતે આવેલા પાલિકાના ભારત રત્ન મોરારજી દેસાઈ ઓડિટોરિયમ હોલ પાછળ પાર્ક કર્યા હતા. રવિવારની રજા બાદ સોમવારે પાલિકા કર્મચારી જેટિંગ મશીન લેવા ગયા હતા અને સ્ટાર્ટ કરવા જતાં ત્રણેય મશીન સ્ટાર્ટ ન થતા તપાસ કરતા ત્રણેય જેટિંગ મશીનમાંથી કોઈ ચોર બેટરી કાઢી ચોરી કરી ગયો હોવાનું પ્રકાશમાં આવ્યું હતું. રાત્રી દરમિયાન ઓડિટોરિયમમાં વોચમેન હોવા છતાં પણ ચોરોએ ઓડિટોરિયમના પાછળના ભાગે વાડીમાંથી દીવાલ કૂદી પ્રવેશ કરી આ ત્રણેય વાહનોની બેટરી ચોરી પલાયન થઈ ગયા હતા. ચોરી અંગે નગરપાલિકાના કર્મચારીએ પારડી પોલીસ મથકે ફરિયાદ કરવાની તજવીજ હાથ ધરી છે.
