સ્ટેટ ડેઝિગ્નેટેડએજન્સીના કન્સલટન્ટ ચંદ્રેશભાઈ પટેલે વિદ્યુતના વપરાશમાં કરકસરની સમજાવેલી યુક્તિ
(વર્તમાન પ્રવાહ ન્યુઝ નેટવર્ક) દમણ, તા.31
ભામટી પ્રગતિ મંડળના કોમ્યુનિટિ હોલ ખાતે આજે સ્ટેટ ડેઝીગ્નેટેડ એજન્સી દ્વારા ઊર્જા સંરક્ષણના સંદર્ભમાં એક જનજાગૃતિ બેઠકનું આયોજન કરવામાં આવ્યું હતું.
આ પ્રસંગે સ્ટેટ ડેઝીગ્નેટેડ એજન્સીના કન્સલટન્ટ શ્રી ચંદ્રેશભાઈ પટેલે પોતાની આગવી શૈલીમાં પાણી, બળતણ તથા વિદ્યુતના વપરાશમાં કરાનારી કરકસરના સંદર્ભમાં વિસ્તૃત માહિતી આપી હતી. તેમણે જણાવ્યું હતું કે, ઘરમાં પાણીનો દુરૂપયોગ નહીં થાય તેની તકેદારી રાખવી જોઈએ અને વરસાદના પાણીના સંગ્રહ માટે રેઈન હાર્વેસ્ટિંગ ઉપર પણ પ્રકાશ પાડયો હતો.
શ્રી ચંદ્રેશભાઈ પટેલે ઊર્જાના વિવિધસ્ત્રોતોની માહિતી આપી વિદ્યુતના વપરાશમાં બચત કરવાની યુક્તિ પણ સમજાવી હતી. તેમણે જણાવ્યું હતું કે, નાની સરખી ટેવથી ઘણાં યુનિટોની બચત થઈ શકે છે. તેમણે ટી.વી.ની સ્વીચ જ્યારે વપરાશ નહીં હોય ત્યારે બંધ રાખવા, રૂમમાંથી બહાર જતાં સમયે પંખો બંધ કરવો, એ.સી.નું ટેમ્પરેચર 24 ફેરનહીટ ઉપર સેટ કરવા જેવી અનેક તરકિબો બતાવી હતી.
શ્રી ચંદ્રેશભાઈ પટેલે દમણવાડા ગ્રામ પંચાયતના વિવિધ ફળિયા અને વોર્ડમાં પણ ઊર્જા સંરક્ષણના સંદર્ભમાં બેઠકો કરવાપોતાની તત્પરતા દર્શાવી હતી. આ પ્રસંગે વિદ્યુત વિભાગના સહાયક એન્જિનિયર શ્રી અનિલભાઈ દમણિયાએ ઊર્જાનો બચાવ શા માટે જરૂરી છે તે અંગે વિસ્તૃત સમજ આપી હતી.
આ પ્રસંગે દમણવાડા ગ્રામ પંચાયતના સરપંચ શ્રી મુકેશ ગોસાવીએ આભાર વિધિ અને ભામટી પ્રગતિ મંડળના મહામંત્રી શ્રી જેસલ પરમારે કાર્યક્રમનું સંચાલન કર્યું હતું.
આ કાર્યક્રમમાં સ્ટેટ ડેઝિગ્નેટેડ એજન્સીના શ્રી ભરતભાઈ બામણિયા, શ્રી તુષારભાઈ પટેલ, શ્રી બ્રિજેશ સહિત ગ્રામવાસીઓ ઉપસ્થિત રહ્યા હતા.
