(વર્તમાન પ્રવાહ ન્યુઝ નેટવર્ક) દમણ,તા.28
પ્રાપ્ત માહિતી મુજબ સંઘ પ્રદેશ દમણના કચીગામ ક્રિકેટ ગ્રાઉન્ડની બાજુમાં આવેલ ક્લાસીક્ ઇન્ડસ્ટ્રીઝ પાસે વાપીના ચલા વિસ્તારમાં રહેતા 52(બાવન) વર્ષીય રિક્ષા ચાલક હરીશ રતિલાલ હળપતિ મંગળવારે સાંજના સમયે પોતાની રિક્ષા લઈને પસાર થઈ રહ્યા હતા. તે દરમ્યાન રસ્તાની ઉપરથી પસાર થતી વીજ લાઈનનો જીવંત તાર અચાનક તૂટી રિક્ષા પર પડતાં રિક્ષા ચાલક હરીશભાઈ હળપતિનું ઘટના સ્થળ પર જ ગંભીર રીતે કરંટ લાગવાના કારણે મોત થવા પામ્યું હતું.
ઘટનાની જાણ તુરંત ટૉરન્ટ વીજ પાવર સપ્લાય કરતી ખાનગી કંપનીના સંચાલકો તથા કચીગામ આઉટ પોસ્ટ પોલીસ મથકને જાણ કરતા જ પોલીસ સહિત વીજ વિભાગના લાઈનમેનો ઘટના સ્થળે પહોંચી પાવર સપ્લાયને બંધ કર્યો હતો. પોલીસે મૃતકની લાશનો કબજો લઈ આ મામલે અકસ્માતનો ગુનો નોંધી આગળની કાયદાકીય કાર્યવાહી હાથ ધરી હતી.
અત્રે નોંધનીય છે કે, ચોમાસુ શરૂ થવા પૂર્વે પ્રિ-મોન્સૂન કામગીરી કરવામાં આવતી હોય છે. પરંતુ કામગીરીમાં વીજ વિભાગ દ્વારા નકરી વેઠ ઉતારવામાં આવી હોવાનું બહાર આવ્યું છે અને તેનો ભોગ નિર્દોષવ્યક્તિએ બનવું પડયું છે. ત્યારે આગામી દિવસોમાં આવી ઘટના અન્ય વિસ્તારોમાં પણ નહીં બને એ પહેલાં વીજ પ્રવાહનું વિતરણ કરતી ખાનગી સંસ્થા ટોરેન્ટ પાવર મેઈન્ટેનન્સનું જરૂરી કાર્ય પૂર્ણ કરે એવી લોકમાંગ ઉઠી રહી છે.