આર.સી.સી. રોડની માંગ વારંવાર ઉઠી છે, પણ રજૂઆતો ઘણી થઈ પણ પ્રજાને 40 વર્ષથી એક સારો રોડ નથી મળ્યો
(વર્તમાન પ્રવાહ વાપી બ્યુરો)
વાપી, તા.06: સમગ્ર વાપી વિસ્તારમાં સૌથી મહત્વનો અને અતિ વ્યસ્ત રોડ ચાર રસ્તાથી ચણોદ ગામ- દેગામ ત્રણ રસ્તા સુધીનો રોડ છે. આ અત્યંત જરૂરી એવો રોડ પ્રત્યેકચોમાસામાં હાલ બેહાલ થઈ જાય છે. ઠેરઠેર મોટા મોટા ખાડા પડી જાય છે. તેનને લઈ અકસ્માત સર્જાવાની ભીતી પણ વારંવાર સર્જાતી રહે છે. ખરેખર તો આ રોડની વ્યાખ્યા ખાડા માર્ગ જેવી થઈ ચૂકી છે.
વાપી ચાર રસ્તાથી ચણોદ ગેટ સુધીનો રોડ ચોમાસાના આરંભમાં જ ખાડા માર્ગમાં રૂપાંતરિત થઈ ચૂક્યો છે. મંત્રીઓ, અધિકારીઓ નવા રોડના વચનોની લહાણી પ્રતિ વર્ષે કરતા રહ્યા છે. ખરેખર તો આ રોડ આર.સી.સી.નો બનાવવાની માંગ સ્થાનિક લોકો વારંવાર કરતા રહ્યા છે. સેલવાસ, દમણ અને વાપીને જોડતો મહત્વનો આ રોડ અતિ વ્યસ્ત અને ટ્રાફિક ભારણવાળો રોડ છે. હાલ ચોમાસાના પ્રારંભે જ રોડે જવાબ દઈ દીધો છે. તેથી ઠેરઠેર ટ્રાફિક જામ થતો રહ્યો છે. કરોડો રૂપિયાનું પેટ્રોલિયમ ઈંધણ વેડફાઈ રહ્યું છે. આ રોડની સમસ્યા વર્ષ બે વર્ષ નહીં બલ્કે વર્ષો જૂની છે. વારંવાર ચોમાસામાં રોડ તૂટી ખાડાઓમાં પરિવર્તિત થઈ જાય છે. પ્રજાને આ સમસ્યામાં છૂટકારો મળે તેવી ગુસ્સા સાથે માંગણી પ્રવર્તી રહી છે.
