વર્તમાન પ્રવાહ ન્યુઝ નેટવર્ક)
પારડી, તા.22: પારડી તાલુકાના સુખેશ વાણીયા ફળિયા ખાતે રહેતા અને સેન્ટીંગનું કામ કરતા ગિરીશભાઈ નશવંતભાઈ પટેલ ઉંમર 47 શુક્રવારના રોજ પારડીના ઓરવાડ ગામે નીલકંઠ નગરમાં કંમ્પાઉન્ડ દિવાલનું કામ કરવા માટે આવ્યા હતા. કંમ્પાઉન્ડ દિવાલનું કામ પૂર્ણ કરી તેઓ દિવાલ ઉપર ચઢી દિવાલ પર લાગેલા ફાલકા ઉતારી રહ્યા હતા તે દરમિયાન અજાણતા દિવાલ ઉપરથી પસાર થતો વીજ લાઈનના તારમાં ગીરીશભાઈનો હાથ અડી જતા વીજ કરંટ લાગતા તેઓ જોરદાર ઝટકા સાથે દીવાલ ઉપરથી સાતથી આઠ ફૂટ નીચે પટકાયા હતા. જેમને તાત્કાલિક સારવાર માટે પારડી કુરેશી હોસ્પિટલ લઈ જવામાં આવ્યા હતા. પરંતુ સારવાર મળે તે પહેલા જ તેઓનું કરુણ મોત થયું હતું.બનાવની જાણ પારડી પોલીસને કરાતા પારડી પોલીસ લાશનો કબીજો લઈ પીએમ કરાવવાની કાર્યવાહી હાથ ધરી હતી. ગીરીશભાઈનું વીજ કરંટથી મોત થયું હોવાના સમાચાર મળતા જ એમના ગામ સુખેશના મોટી સંખ્યામાં લોકો સરકારી હોસ્પિટલ દોડી આવ્યા હતા.
