(વર્તમાન પ્રવાહ ન્યુઝ નેટવર્ક)
પારડી, તા.04: દારૂબંધી વાળા ગુજરાતમાં છેલ્લા અઠવાડિયા દરમ્યાન બનેલા લઠ્ઠાકાંડ બાદ હરકતમાં આવેલ સમગ્ર ગુજરાતની પોલીસ શોધી શોધીને બુટલેગરોને જેલના હવાલે કરી રહી છે. તો બીજી તરફ બુટલેગરો પણ પોલીસને ચેલેન્જ આપી નવીનવી યુક્તિઓ અપનાવી સંઘ પ્રદેશ દમણ અને સેલવાસથી દારૂ ભરી ગુજરાતમાં લાવી પોતાનો દારૂનો ધંધો ચલાવી રહ્યા છે. ગઈકાલે પારડી પોલીસ સ્ટેશનના આ.હે.કો.ચંદુ સુરપાલ, પો.કો. બિપિન નટવરજી, આ.હે.કો. મહેન્દ્રસિંહ મહોબ્બતસિંહ વિગેરેનાઓ
પેટ્રોલીંગમાં હતા એ દરમ્યાનમાં પો.કો.બિપિન નટવરજીને સેલવાસથી ભિલાડ થઈ વાપી થી વલસાડ જવાના રોડ પરથી દારૂ ભરી એક પિકઅપ ટેમ્પો નંબર જી.જે.27.ટીટી. 4510સુરત જઈ રહ્યો હોવાની બાતમી મળી હતી. જેને લઈ પારડી પોલીસે પંચો સાથે ઓરવાડ હાઈવે સ્થિત ગિરિરાજ હોટલ પાસે નાકાબંધી કરી બાતમીવાળા પિકઅપ ટેમ્પોને ઉભો રાખી તપાસ કરતા પ્લાસ્ટિકના દાણાની બેગની આડમાં વગર પાસ પરમીટનો દારૂ તથા બિયર નગ 624 કિંમત 1 લાખ 75 હજાર તથા ટેમ્પાની કિંમત 3 લાખ અને 5 હજારનો મોબાઈલ મળી કુલ 4 લાખ 80 હજાર મુદ્દામાલ સાથે મુકેશ નાથુભાઈ દાસ રહે.વટવા, અમદાવાદની ધરપકડ કરી માલ ભરાવનાર અને પાયલોટીંગ કરનાર આર્યનસિંહ ઉર્ફે અરવિંદ ચૉહાણ રહે.ખાનવેલ તથા વિજયસિંહ અને ચેતનસિંહ રહે. સેલવાસને વોન્ટેડ જાહેર કરી વધુ તપાસ પારડી પોલીસ કરી રહી છે.
