સ્થાનિકો અને ફાયરની ટીમે રેસ્ક્યુ કરી તરૂણીને ઉગારી લીધી
(વર્તમાન પ્રવાહ વાપી બ્યુરો)
વાપી, તા.15: રામ રાખે તેને કોણ ચાખે યુક્તિ આજે વલસાડમાં સાર્થક બની હતી. કૈલાસ રોડ નજીક વહેતી ઔરંગા નદીના ધસમસતા પાણીના પ્રવાહમાં સગીર વિદ્યાર્થીનીએ પડતુ મુકી આપઘાત કરવાની કોશિષ કરી હતી પરંતુ સ્થાનિકોએ જોઈ જતા ફાયર બ્રિગેડને જાણ કરતા તમામે રેસ્ક્યુ કરીને સગીર વિદ્યાર્થીનીને બચાવી લઈને કસ્તુરબા હોસ્પિટલમાં સારવાર માટે ખસેડાઈ હતી.
જાણવા મળેલ માહિતી મુજબ વલસાડના નજીકના ગામે રહેતી વિદ્યાર્થીનીને ગતરોજ સ્કૂલે નહી જવા બાબતે ઠપકો આપ્યો હતો. તેથી માઠું લાગતા આજે ગુરૂવારે કૈલાસ રોડ પાસેની ઔરંગા નદીમાં ઝંપલાવી દીધુ હતું પરંતુ બેગમાં હવા ભરાઈ જતા વિદ્યાર્થીની તણાતી તણાતી લીલાપોરના નાનાપુલ કિનારે આવી કાદવમાં ફસાઈ ગઈ હતી. લોકો જોઈ જતા યુવાનો અને ફાયર બ્રિગેડએ તરૂણીને ઊંચકી બહાર કાઢી કસ્તુરબા હોસ્પિટલમાં સારવાર માટે ખસેડી હતી.
