(વર્તમાન પ્રવાહ ન્યુઝ નેટવર્ક)
સેલવાસ,તા.17 : દાદરા નગર હવેલીના ગલોન્ડા ગ્રામ પંચાયતમાં ‘આદિવાસી એકતા પરિષદ’ અને ‘સર્વ આદિવાસી સમાજ સંગઠન’ના તત્વાધાનમાંઅનુચ્છેદ 13(3)ક પરંપરાગત કાનૂન રૂઢિ પ્રથા મુજબ અનુચ્છેદ 244(1) પાંચમી અનુસુચિત ક્ષેત્રના ઉપબંધો અને અનુસુચિત જનજાતિઓના સ્વશાસન પ્રશાસન કલ્યાણ અને નિયંત્રણ વિધિના મુજબ કેન્દ્ર શાસિત પ્રદેશ દાદરા નગર હવેલીના ક્રાંતિકારી અને સ્વતંત્ર સેનાની જમનીબા વરઠાના નામે ચોકના નામ માટે સર્વસંમતિથી પ્રસ્તાવ પાસ કરી ‘સ્વતંત્ર સેનાની જમનીબા વરઠા ચોક’ જાહેર કરવામાં આવ્યો છે. આ ચોકનું અનાવરણ સ્વયં સ્વતંત્ર સેનાની જમની બા વરઠાના કરકમલો દ્વારા કરવામાં આવ્યું હતું. નામકરણ માટેના પ્રસ્તાવની નકલ ગલોન્ડા પંચાયત, જિલ્લા પંચાયત, જિલ્લા પ્રશાસન અને પ્રશાસકશ્રીને મોકલવામાં આવશે.
આ અવસરે વરઠા પરિવાર, વારલી સમાજના આગેવાનો, આદિવાસી એકતા પરિષદના પૂર્વ રાષ્ટ્રીય અધ્યક્ષ અને સર્વ આદિવાસી સમાજ સંગઠનના સંયોજક શ્રી પ્રભુભાઈ ટોકીયા, દમણ એક્શન યુથ એક્શન ફોર્સના પ્રમુખ શ્રી ઉમેશભાઈ પટેલ, આદિવાસી એકતા પરિષદના અધ્યક્ષ અને ટીમ સહિત ગ્રામજનો ઉપસ્થિત રહ્યા હતા.
