(વર્તમાન પ્રવાહ ન્યુઝ નેટવર્ક)
ચીખલી,(વંકાલ), તા.21: ચીખલી તાલુકાના સાદડવેલ વાંજરી ફળીયા ખાતે રહેતા અશોક મંગુભાઈ પટેલ (ઉ.વ.48) જે સોમવારની સવારના સાડા સાતેક વાગ્યાના સમયે પેશન મોટર સાયકલ નં.જીજે-21-એન-9816 લઈ ગામમાં દૂધ મંડળીમાં દૂધ ભરાવા માટે ગયા હતા. દરમ્યાન સાદડવેલ ભૂમિ એગ્રોની સામે આવતા પાછળથી પુરપાટ ઝડપે આવી રહેલી એક આઈ-20 કાર નં. જીજે-21-બીસી-2865ના ચાલકે અશોક પટેલની મોટર સાયકલને પાછળથી ટક્કર મારતા જેમને માથાના ભાગે ગંભીર ઈજા થતાં મોં તેમજ કાનમાંથી લોહી નીકળતા સારવાર માટે 108ને બોલાવતા ફરજ પરના તબીબે મૃત જાહેર કર્યો હતો. જોકે અકસ્માત કરી આઈ-20 કારનો ચાલક સ્થળ ઉપરથી ફરાર થઈ ગયો હતો. બનાવ અંગેની ફરિયાદ મરનારના મોટાભાઈ અર્જુન મંગુભાઇ પટેલ (ઉ.વ. 52)(રહે.સાદડવેલ વાંજરી ફળીયા તા.ચીખલી) એ કરતા પોલીસે અકસ્માત મોતનો ગુનો નોંધી વધુ તપાસ પીએસઆઈ એમ.એચ. શીણોલ કરી રહ્યા છે.
