(વર્તમાન પ્રવાહ ન્યુઝ નેટવર્ક)
સેલવાસ,તા.05 : સોલાર પેનલ દ્વારા સંચાલિત મોટર પમ્પ દ્વારા ખેડૂતો આખા વર્ષ દરમ્યાન પાક લઈ શકે અને તેમની આવક વધે અને તેમનું જીવન સ્તર ઊંચું આવે તે હેતુથી સી.એસ.આર. અંતર્ગત અને બાયફ ડેવલપમેન્ટ રિસર્ચ ફાઉન્ડેશનના સહયોગ દ્વારા દાદરા નગર હવેલીના કરજગામમાં સીલોકસ ઇન્ડિયા પ્રાઇવેટ લિમિટેડ કંપનીના સોલાર લિફટ ઇરીગેશન સિસ્ટમની શરૂઆત કરવામા આવી હતી. જેનું ઉદ્ઘાટન દીપ પ્રાગટ્ય કરીને કરવામાં આવ્યો હતો. બાદમાં સોલાર પેનલ દ્વારા પાવર રૂમનું રીબીન કાપી ઉદ્ઘાટન કરવામાં આવ્યું હતું. આયોજનાથી ગામના 21 જેટલા ખેડૂત પરિવારોને લાભ મળશે અને અંદાજીત 6.5 એકર જમીનમાં આખા વર્ષ દરમ્યાન પાણીથી સિંચાઈ કરી શકશે.
આ અવસરે ખેરડી પંચાયતના સરપંચ શ્રી યશવંત ઘુટીયા, કૃષિ વિભાગના અધિકારી શ્રી એસ.એ.ભોયા, સુપરવાઇઝર શ્રી આર.કે.પટેલ, જિ.પં. સભ્ય શ્રી કાકડ કુરકુટે, કંપનીના મેનેજર શ્રી નયન ભાવસાર, સી.એસ.આર. એક્ઝિક્યુટીવ શ્રી મયંક દોડીયા, ડેપ્યુટી મેનેજર શ્રી મનીષ ભગત, બાયફ સંસ્થાના પ્રોજેક્ટ કો-ઓર્ડીનેટર શ્રી કલ્પેશ ભોયા વગેરે ઉપસ્થિત રહ્યા હતા.